قبل القول .. سلامات وعوافي
علي ريسنا وع اللي مصحصح
وكمان ع اللي اتمدد حافي
................
ليه الاستجواب للداخليه ¿!
والله ده شغلها ميه لميه
وقبل ما حد يقول نتاش
يقول بكاش ..
اسمعوا مني القصه دهيه
................
كانت البنت الحلوه نزاجه
تطلع تنشر أيها حاجه
تلقاني واقف ليها أبصبص
من شباكي أقعد أتبصص
................
لما راجلها علم بالقصه
بقي يطلع هوه اللي ينشر
شفتوا يا خلق الناس الناقصه
ده بخلقته عمري ما بأستبشر
...............
رحت شكيت للبيه المأمور
قاللي بنفسي راح أطلع أعاين
راجل عتره وابن أصول
بيه الحق راح يكون باين
................
ظهر الراجل ..
بان بغسيله
شافه المأمور غمض عينه
أمره يغور ويطلع مرته
تطلع تنشر بيني وبينه
................
هل هلال الحلوه نزاجه
جت وجمالها يفوق العاده
شافها المأمور بحلق بلم
قاللها مصر صحيح ولاده
................
بعدين قال للمدعوء جوزها
راح أقول كلمه وهتنفذها
مرتك تنشر علي كيف كيفها
وإياك يوم واحد تناكفها
................
ولجل البيه المأمور يطمن
إن الأمر راح يكون ساري
من نهاريها وهو مأنس
لابد علي طول في الدار جاري
لما تهل عليه يتنهد
لما تغيب جعورته تلالي
...............
شفتوا يا ناس شغل الداخليه ¿
والله ده شغلها ميه لميه
استجواب إيه وإحاطه إيه ¿!
سيبكوا يا ناس م الشوره دهيه