كل يوم بنكبر علي أرضها ۔ كل يوم بنشرب من نيلها وبناكل من زرعها و نلف ونروح ونجري في شوارع قلبها ۔ أصل أنا بحبها لإنها طول عمرها شيفانا وإحنا بيتاكل حقنا وشايفه اللي ماسك حكمها وشايفه طيبه شعبها وشايفه خيرها بيتنهب من ناس بتقول إنها من هنا بس هما مش مننا ۔ في ناس ظلمت نفسها حكمت سنين وإحنا مش دارين ۔ نسينا إننا من حقنا نعيش من خير أرضنا ۔ وكبيرنا اللي قولنا عليه كبيرنا ياخساره طلع منها بخساره لإنه كان حاكم شعبها طول فترته بظلم ناس من حقها تحلم ببكره وتقول اللي في نفسها ۔ ياخساره علي خيبه أملها في اللي كنا بنقول دا بيحبها وحامي شعبها ۔ طلع الكبير مش كبير جمع الكتير من خير أرضها وحمي ناس كتير زيه نهبت كنوز شعبها ۔ أكيد دول مش منها ولا شربوا من نيلها وأكلوا من زرعها ولا هم من دمنا ولا ريحتهم زينا ۔ إحنا ولاد البلد بنحب أرضنا مش عاوزين نكون زيهم بس عاوزين نبعد اللي زيهم عننا عاوزين نبدأ بنفسنا ونقول من كل قلبنا إحنا ولاد البلد كبرنا علي أرضها وبنحب ترابها وأرضها ۔ لازم نتغير علشان نرضي أرضنا ونحترم نفسنا ۔ سامحيني يابلدي ياغاليه لإن بظلمهم لينا ظلمنا نفسنا وبقينا نعمل زيهم مع إننا مش زيهم بس وحياتك يابلدي لغير طريقتي ومنهجي ودا نداء مني لشعبها إنه يعمل اللي يرضي أرضنا ۔ ويصون كرامه شعبنا ۔ وياريت كل واحد مننا يمسك قلم ويكتب اللي كان يعمله من ظلمه لنفسه ونفسنا ويحاول يغيره ويقول الحق ويكتب الحق ويدافع عن الحق ۔ بيقولوا زمان كانوا أحسن مننا وبيقولوا كانوا عندهم حاجه مش عندنا < حاجات غريبه في عصرنا حبهم لبعضهم وطيبه قلبهم > بس أنا بقول إننا ممكن نكون أحسن منهم لو حاولنا نغير نفسنا وبحبنا لبلدنا نحب بعضنا وصنا النبي عليه الصلاه والسلام علي حسن الجيره وياريت نبطل غيره ونسامح بعضنا ونساعد كل أيد محتاجه لينا أول بدايه نرضي ربنا علشان يرضي عننا ۔ ربي سبحانه وتعالي مقلب القلوب ياريت نتغير وننقي قلبنا ونقول يارب وأكيد رب العالمين مش هيخيب ظننا ۔ هو ده ملجئنا لو فعلا عاوزين بلدنا ترجع لنا وناكل من خير أرضها وننام في دفي حضنها ۔ والله بحب بلدي وأفتخر بيها مع إني إتهنت فيها وإتظلمت كتير فيها لكن غصب عني بحبها ۔ فيها شيئ غريب في دم كل واحد مننا ۔ سبحان ربي اللي جمع حبها فينا ۔ نفسي الخير يعم علينا ونعيش في سلام علي أرضنا الحبيبه لإن كل يوم بنكبرعليها
تعليق:
أرجو من الأعضاء الكرام التكرم بإبداء أرائهم
