سامحيني

سامحيني مقدرش اوصفك طلعت خايب
ذميت كتير فيكي   اوي يا اغلي الحبايب
كان كل وصفي فيكي هم وريحته غم
إزاي نسيت انك حبيبتي وبرده ام

إزاي زمان شفتك كدا شفتك قبيحه
مستخسره فينا الحنان رافضه النصيحه
كل الأكابر حبلوك بالزنا
واحنا هنا بنداري وياكي الفضيحه

بس النهارده بعترفلك طلعت خايب
حاطط في ودني الف سد وكنت غايب
وعشان اعديلك انا خايف وهايب
سامحيني يا اغلي الحبايب

النهارده حبي ليكي حب رافض للخضوع
رافض يعيش باقي اللي فاضل في الضلوع
حالف يرجع مجد تايه في الربوع
حالف ليوصف فيكي الحسن بالوانه
والفجر لايح بقرءانه وادانه
فلاح بيسقي في ضي الشمس في غيطانه
ساحب بقرته علي حمارته وعنوانه
انا المصري ومين قده
في حبه ومجده وكيانه

نفسي يامصر لو جعنا النهارده متزعليش
لاجل الرخاء لازم سنين عجاف نعيش
بس العجاف بأيدينا شهد
بأيدينا مش ايد اي حد
لاجل ما يكون لينا حد
يقطع ايدين الظلم والخاين
اللي هنا عليه وطينك كان عليه هاين
ومن النهارده خلاص رمز الفساد سايب
هو اللي هايب وشعب مش هو اللي هايب
واعذريني لو في يوم   موصفتكيش
ما انا قلتلك في الوصف انا خايب