اوعاك تثور...
ماعادتش تنفع ثورتك...بينك وبين الحق مليون الف سور
اوعاك تثور...
واحلم ببكره زينا...يمكن ليالي الظلم ترحل أو تغور
أوقات كتيره بينحصر بينا الشيطان وبنهزمه
والظلم راكب ع القلوب من تاني صعب نحزمه
اوعاك تثور...
ماعادتش تنفع ثورتك...بينك وبين الحق مليون ألف سور
تتحدي مين...¿
تتحدي خوفك ولا تتحدي الطوفان...¿
تتحدي سيف القهر أو غدر الزمان...¿
أنا مش جبان..
أنا بس عايش جوه خوف مبينتهيش .
علشان أعيش....!!!
اوعاك تثور..¿
وخليك كده زي ما كان أيوب زمان راضي وصبور..
قبلك كتير اتمردوا واتشردوا ف وسط الطريق...¿
كان حلمهم زيك كده...كان قلبهم صافي وبرئ...¿
اوعاك تثور...واوعاك تقول انك جرئ...¿
واوعي الغرور...¿
ممكن في لحظه تلافي نفسك جوه جحر من الجحور...¿
أو عضم تايه في القبور...¿
اوعاك تثور...واحلم ببكره زينا
يمكن ليالي الظلم ترحل أو تغور...¿
كل الوجوه اتغيرت...واحنا كمان...لازم نغير نفسنا...او لبسنا...نهرب لدنيا فيها ننسي نفسنا...¿
ونعيش في جحر من الجحور...وياريت يكون في الجحر نور
وساعتها مش ممكن نثور...¿
اوعاك تثور...¿
خايف عليك من غدرهم ..
من ظلمهم ..
من أمر صادر م القصور ....¿
أو م التعالب والنسور.....¿
اوعاك تثور ..¿
يمكن يجيلك يوم تشوف فيه الهنا.
واحنا كمان نرمي ورانا المسكنه.
خليك هنا
واوعاك تسيبنا لوحدنا..¿
ده انت الوحيد اللي مالينا بالأمل .
وانت الوحيد اللي انضرب بيك المثل ..
علشان بطل.
اوعاك تثور..
واذا كان حتاخدك عزتك أو جرأتك ونويت تثور...¿
خليك بعيد...
لا نعرفك
ولا عمرنا شفناك علي مر الدهور...¿
وان حد سأك عننا...¿
اوعاك تقوله اسمنا...¿
انت لاعمرك شفتنا...¿
ولا زرتنا جوه الجحور...¿
اوعاك تثور...ماعادتش تنفع ثورتك...
بينك وبين الحق مليون ألف سور...
اوعاك تثور...
واستني ويانا الأمل ...يمكن يحقق حلمنا ونعيش هنا لحظه عبور...¿
واوعاك تثور.