الدنيا ست كبيره ولابسه نظاره
ساكنه لوحدها فوق سطح عماره
لابسه بالطو قديم وف بقها سيجاره
تاخد نفس تحبسه وتطلعه بحراره
بتقوللي اوعي تبيع الغالي بخساره
وتجيب رخيص وتقوللي دي شطاره
وشغلك تمللي يبقي من ورا ستاره
دي اكبر نار كان اصلها شراره
والحب لو كبير اوله إشاره
والهرم لو عالي برده اصله حجاره
ووالله زمان بتقولها بمراره
*********
الدنيا دي مدرسه وفيها نتعلم
وبأعلي صوت وفي السر نتكلم
ولو يوم تعيد الدرس من تاني
بإيه يفيد اللي طول عمره مبلم
********
اسمع كلام م الدنيا غيره مفيش
يابن ادم فعلك كله طيش
بامر ربك في الارض عيش
ولو يوم ينتهي عمرك
تبقي الدنيا بعدك ما تنتهيش
********
لو بتحب الحياه
تبقي فاهمها غلط
عمال تقول في كلام
كله عبط في عبط
الدنيا يابني للسباع والنمور
والفتات يبقي للكلاب والقطط
ولو ميزان الدنيا يوم انظبط
تلقي العيال بيحدفوك بالظلط
*******