علي زهره ناديه
نقشت كلمه
خادها الندي
نزلت معاه
قلت الندي
حقق مناه
وحبه اللي كان
تايه لقاه
واصبح بدايته
وكل غايته ومنتهاه
رجعت تاني
لقيتها دبلت
قلت الندي
اخلف ليه وعده
قاللي النسيم
هييجي بكره
أو ييجي بعده
وبكره فات
وبعده عدي
وليه دبلتي
يا احلي ورده
سمعت صوت
يقوللي اصله
اصل اللي كان
يرجع لاصله
اصل الندي
كان موجه عاليه
او نهر يجري
فوق صخره عاليه
والموجه راحت
عالشط وقفت
والنهر منه
الميه نشفت
لما الندي قرا كلمتي
والكلمه كانت
اسمك حبيبتي
علي زهره ناديه
نقشت كلمه
والكلمه كانت
اسمك حبيبتي
علي ورقه خضرا
رسمت صوره
جانا الخريف
دبل ورقنا
وبنسمه هاديه
نشف عرقنا
وفاتت سنه
وفاتت سنين
والشجره طرحت
عود ياسمين
بصيت عليه
لقيت كلام
تحت الكلام
لقيت سلام
للي وصف
أجمل قمر
واللي رسم
أجمل قوام
علي ورقه خضرا
رسمت صوره
والصوره كانت
صورتك حبيبتي