التنين الأحمر قام
جيش جيشه وعقد العزم
يغزو العالم بس بلئم

المره دي منافسه شريفه
حته قفزه إنما حريفه
أخرجها ولا أجدع فيلم

درس الفكره دراسه عميقه
حسب الحسبه لكل دقيقه
مش جت فجأه ولا مباغته
كله بيمشي حسب الخطه
لغايه كل أموره ما تتم

شغل صنع طور صدر
أتي عاليابس غرق لخضر
وبإيده العامله عمل العمله
خلي العمله الخضرا ترن

الخطه وكانت وطنيه
لعبوها لعبه محليه
قالوا هنقدر ويا عددنا
وبحبه صبر وإتقان
نتقدم ونعلي بلدنا
ونسابق أغني البلدان

حطو قدمهم   جوه الملعب
والسفاره قبل ما تضرب
هتف العالم "جوه الجون"
نط   الكابتن فوق بحنون

راهن ورهانه كان صعب
اختار فوزه يحققه شعب
رسم الرسمه وهجم الهجمه
اللي مدوخ بيها الغرب

أجمل حاجه في التنين
إنه صاحب فكر ونيه
بعد سنين وسنين وسنين
من صبر وجهد وتنظيم
قام صحي كل النايمين
والكلام لسه له بقيه

اما أحنا فيا ليلي يا عين
نازلين لعب وهلس وتفانين
كلوا اتطور واحنا في الهيش عايشين
كله بيذوء وطالع عينه
وإحنا عالقاعده مصرين

ليه نرضي بشغل التباع
ليه أغلي ما نملك ينباع
والكنز الاسود بياع
قومي افتحي مليون شراع
قبل ما تبقي بلادنا المرتع للأشياع
لاجل السلم ولاجل الحلم
ولاجل الهجمه ما تتحول لدفاع

الدنيا متكامله يا أمه
وحدي صفك عدي الغمه
خلي العلم لليلك شمعه
وخلي في قلبك حبه رحمه
بالفتحه وبكسره وضمه
وبعزه ونخوه وحبه همه
سددي ضربه فى أخر جوله
ضربه يا أمه تكون القاضيه

لمي عقولك ويا أقلامك
بالكلمه تحققي أحلامك
فاكره يا أمه¿
فاكره اللمه¿
طب مش فاكره حتي النصره
ولا إنت احتلتك الحسره
وبرعتي في الخزي والكسره
واستحليتي ضياع البصره
وحطيتي التوقيع والبصمه
ورضيتي ببنود النصبه
ونسيتي في الزحمه الأزمه

كل عيوبنا لغيرنا ميزات
وبلادنا محتاجه عتاد
وإن كان عالزاد والزواد
فاحنا اللي بنصرف عالدنيا
ليه أموالنا رايحه لغيرنا
فين العلم وفين علماءنا
حبه في ناسا وحبه في ييل
وولادنا شايلين الويل
مش لنقيصه ولا لجهاله
إحنا عقولنا في أحسن حاله
بس الرك عى النقاله
إللي في ناسنا نازله تشيل

إللي بتنقل كل نبيه للانعاش
وإن كان أجله لسه مجاش
أو زمزء حبه ولا رضاش
يتمرمغ في تراب الميري
ويبيع أحلامه ببلاش
يتخانق مع ريس عاطل
نازل يقرا في الجرنال
عمال كده   كده علي بطال
ولما تراب الميري هيخلص
يجري يلحق في المتخصص
يمكن حلمه في يوم يرجعله
بعد الشهر الأول يفطس
وبعد الثاني يفك ويملص
وبعد نصايح كل معارفه
يجري في حضن الغرب ويغطس
أصل هناك الخوجه صياد
بيشمشم علي عقل نضيف
لاجل ما يعلي بالمنطاد
وعلي أمجاده يضيف ويضيف
والراجل داخل دوامه
بين بلده و بلاد الصيد
ولما يحن لبلده يشوفها
تحرق قلبه بكل ظروفها
ومهما يجيبها يمين وشمال
مش هغير في الأحوال

مش هيشغل العاطلين
ولا يقاضي الفاسدانين
ولا يعقل المجانين
ولا يقعد الواقفين
ولا يفوق الدايخين
إحنا يا خلق الله عايزين
معجزه الواحد والعشرين
علشان نرجع بني أدمين!