يامصر حبك وجع

في حب مصر كتبت الشعر علي موجه
ساعات تنزل.. ساعات تطلع
تخبُط في الصخور تخضع
تلفُ الدومات ترجع
لكنها ما بتنتهيش
وغيرها جوا قلبي مافيش
وبتمني لو تاخدني رهين
وأغازل حضنها الياسمين
وترميني جوا بحر العشق
وتنساني في الغريق وماجيش
في حب مصر بموت كل يوم وبعيش
بلملم فيها احلامي المرمُيه في كل مكان
وأصبُر بيها ايامي اللي كانت لما كنت زمان
محاره في بحرها المرمر
في حلقي حبها ممرر
تبعُني لقطر هيولع
لمركب بكره هيودع
لكل اللي اشتري ووزع
وبرجع احبها اكتر
تدوس علي قلبي بالجزمه
وترميني ما ليش لزمه
وعمري ما سيبتها في أزمه
وبرضه بحبها واصبر
في حب مصر
كتبت الشعر فوق خصري
وشمت النسر علي صدري
رسمت الرايه فوق ضهري
وخبيتها بعيييييييييييد خالص
هناك جوا ساااااااابع قلب
وروُتها بوريد الحب
خلاصه لانتماء من صب
ووضُتها من خرير دمُي
دي أم الدنيا مش أمي
ولا كانت في يوم أمي
دي مصر العيله واللمه
ومصر حراره الضمه
ومصر مناره الامه
ومن غيرها القيامه تقوم
انا ابن الستينات الشوم
أيوب يامصري
وصابر علي الشقا المقسوم
ايوب وغافر ذنبها
وتفرح لو تبات مظلوم
مخنوق وبرضك حبها
جواك بيكبر كل يوم.....
انا مين في بحرك
ياحته من قدر محتوم
أنا موج بعافر واسافر
ولُا غريق بيعوم
انا مين في بحرك
يا سايقه في الدلال واللوم
وبريئ بحاول أبرر
سر كل هجوم
وجريئ بأوح وأصبر
قلبي يوم ورا يوم
أنا مين في بحرك
يابدر منوره يانجوم
أنا حلم سابق في الزمان سني
وأنا ابنك المدبوح
علي عتبه النني
وانا اللي برضه بموت
طول ما انت بتأني
وأنا اللي فوق السحاب
طاير مع إني
تحت الرجول منداس
تتبري ليه مني¿
عراف وشاف الودع
قال الطريق مسدود
انا قلت لا للوجع
دا لكل ظلم حدود
عراف وشاف الجدع
قالُي علي الصوره
ويامصر حبك وجع
طول ما انتي مكسوره
أنا نفسي أكتب قصيده
مليانه شوق وحماس
وأنشرها فوق العلم
ويرفرف الاحساس
وألقاني بفرح وأنا
بيسمعها كل الناس
وأقول عشانك انا
مولود كده شاعر
ماعرفش غير القلم
بالهمزه انا شاعر
وهفضل أكتب انا في
الشعر طول عمري
لو حتي وقعت سناني
ولُلا انحني ضهري
يا مصر دا انتي الامان
وانتي الدفا في التوب
وإنتي روح الفؤاد
والقلب فيك يدوب
مع اني فيكي طريد
فوق الجبين مصلوب

شعر/ ايهاب وفا