ذكريات
فدادين شطاره وألف فرصه وبنك حظ
والنصيب غلاب ومكتوب ع الجبين
حبات مطر ...أوراق شجر..
وكتاب موده بدون غلاف
بقراه تملُي في السفر
مكتوب تكوني ذكريات
لحكايه من عشرين سنه
أطلال دموع متحجره علي كل جفن
وألف تنهيده أنين
مرت سنين
وعنيكي لسه بتتهمني بالنداله والجنون
لكني ما بعرفش أخون
ولا كانش تفرق لو تكوني أو أكون
كله إنتهي
ومش مهم تكوني انتي في الصداره
أوأكون في المنتهي
ولا مره حتي قلتها
البدايه بوسه كانت ع الجبين
كات بوسه عاميه وبعترت فيا السنين
ولما لمتها إنجرحت
مين فينا باع¿
مين فينا فضُل يرمي قلبه جوه احساس الضياع¿
مين فينا حاول لانصياع لهواه وغريزته¿
مين فينا حب ان الخيانه تبقي ميزته¿
مش هينطقها لساني مش هااقولها
لحد تاني
انا كنت بحلملك قوي
وكنت برسملك ملامح كل عاقل او سوئُ
كنت بجرح لجل أداوي
كنت عامل زي حاوي
بيبتسم وف قلبه جرح
كات عواطفي مالها حد
أيوه حبيتك بجد
لكن انتي بنيتي سد
خلُي بذر الشك يطرح
جوه قلبي ليل وبرد
صدقيني ما عادش مطرح
ليكي ولُا لأي حد
صدقيني البذره نالت من يقيني
حس قلبي بخوف وصد
وابتدي صوت السكات
حن قلبك للعناد
كان ضروري اسيب مكاني
كان لابد ارحل لوحدي
وانزلك من فوق حصاني
واكمل المشوار وجع
ومش هوشوشلك ودع
كل شئ اصبح عدم
مش هينفعلك ندم
باقي كومه ذكريات
طلُي طله ع اللي فات
هتلاقيني مش أناني
لمُا قررت الرحيل
والسبب هو ببساطه
ان حبك كان حقيقي
حب قاسي ومستحيل