حدود
مش إنت برضه مننا
وعنيك بتبكي زينا
ولا إنت مش همك علينا
مش برضه غزه زي بيروت
زي بغداد زي سينا
مش برضه جرحنا منا فينا
نستني إيه مش إنت شايف
أطفال جتتها مقطعه
وحريم إيديها مرفعه
وشيوخ بتبكي ف كل دار
والدم فاض ع الأرض لما
حصل الحلق اللي شقق
من صراخ المظلومين
وشرقنا بيه..
وغرقنا فيه..
وكتبنا ليه
غزه أخر خيط أمل
وهمُ أطفالها جبل
مش هنقدر يوم عليه
دي القضيه...(حاله خاصه)
القضيه فيها أقصي
والنفوس ما عدتش ناقصه
تحتمل دم الضنا
دا اللي ماتوا في يوم في غزه
قد اللي بيموتوا ف سنه
كل اللي ماتوا هناك بشر
والدم لوُن ميه النيل اللي راكده
لوُن الطوب والشجر
وحياه بواقي النخوه فينا
دمنا ما يروح هدر
وقدره الله اللي خلي
روح شارون أربع سنين
بيموت حتت
واللي ياما عاث في سينا
وياما قطع في الجتت
الأقصي لازم يوم يعود
غصب عن عين اليهود
وكل نقطه دم سالت
من شهيد عدي السدود
وكل دمعه نزفها طفل
يتيم وسالت ع الخدود
وكل أنه أم ثكلي
حلمها الغايب يعود
هيدفعوا قصادها التمن
لو مره وحدنا الحدود
أو مره عدينا الحدود