دم الأسري
         
          (   قامت اسرائيل بعرض فيلم يكشف
جريمه التمثيل بأسرانا بعد حرب اكتوبر )

لما تئن الأرض وتصرخ ما تدوسنيش
ما تخطيش علي دم اتبحتر يوم علشانك
وعشان ما انت تعيش
دم اخواتك لسه بيشلب
وعليه نابته زهور وحشيش
لما تئن الارض وتصرخ
ما يعديش
قتل الأسري العٓزُْل أبدا ً
أبدا أبدا ما يعديش
دم الشهدا ما بيرويش
ولما تنادي الأرض عليكي
وما ترديش
فاكره يابلدي
بكده حنعيش
والدوامه سكنت هيش
هنحط الطرحه علي الجيش
أبدا ًماحنش ريش ۔ ومفيش
ولاعمر التار ۔ كان بقشيش
ولا يوم خوُفنا التهويش
وما ينفعش نعيش ملاطيش
مش مكسوره عنينا ولااحنا
شخشيخه وحبه حرافيش
وما ينفعش نهادن أصلا ً
نفضل لعبه في ايد مهابيش
لازم نقطع ايد واجعانا
بمعونه وهدنه تهميش
لما تئن الأرض وتصرخ :
ما تبعنيش
لو هتساوم ۔ ما تلومنيش
لو هتخاف علي ضهري وتسكت
اخرك بطني ومش هتعيش
لو هتخاف م الموت هتموت
لكن موت بكرامه تعيش
إوعي تسيب حقنا لصهاينه
ياللي ف ايدك تاخد تارنا
دي ما ينفعش معاها مماينه
وارفع راسك ما توطيش
محناش جٓبنا ۔ ولا خفافيش
ولما تئن الارض وتصرخ
تفتكروا هنسكت كالعاده
ولا هنفضل كده دراويش
ولا اللي يعدي ما بيجيش
ولا اللي يعدي
                .. ما بيجيش ¿!!!