قصيده جحا
الشاعر هشام الجخ
——————
شعور سخيف
إنك تحس بإن وطنك شيء ضعيف
صوتك ضعيف
رأيك ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

سألوا جحا عن سر ضحكه
قالك أصل اتنين وشبكو
اللي كان من تحت ميت
واللي كان من فوق كفيف

دا شعور سخيف
وشعور سخيف
إنك تكون رمز الشحاته
تبني مبني للشحاته
تعمل وزراه للشحاته

يا ساقيه دوري … عدي فوقي ودوسي
نصبوا عليا وشحتوني فلوسي
ربطوني فيكي .. حتي ما اتغميت
هما اللي فرحوا ووحدي أنا اتغميت

أنا اللي صاحب البيت
عايش بدون لازمه
ولما مره شكيت
إدوني بالجزمه

أنا اللي زارعك دهب
بتأكليني سباخ
إن كان ده تقل ودلع
بزياده دلعك باخ
لا شفت فيكي هنا
ولا شفت فيكي ترف
كل اللي فيكي قرف

كرامتنا متهانه
واللقمه بإهانه
بتخلفينا ليه لما انتي كارهانا

يعني ايه تبقي إنتي هبه النيل يا مزه
وكل يوم الميه تقطع
يعني ايه لما اشتكي غلو الفاتوره
يقولو تشكي بس تدفع

لما قش الرز ثروه بتتحرق
وأما نفط الأمه ثروه بتتسرق
وأما جلادك علي ولادك بيبطش
وأما علمك ما يلاقيش يأكل فيطفش

يعني ايه نرفع ايدينا بالسلام لجل الغزاه
ويعني ايه لما ابقي ماشي في حالي اتشد اشتباه
يعني ايه لما اتحبس أربع سنين حبس احتياطي

يعني ايه مش حاسه بالعمر وغلاوته
بتصبي مر العمر ليه
ده انا كنت ح اوهب لك حلاوته

أنا عمري ما أتأمرت
ولا حطيت شروطي
ومكان ما ترسي مركبك
بابني شطوطي
أنا كنت جيشك لما مماليلك باعوكي
وكنت يوسف لما عشتي سنين عجاف
وضلوعي دي اللي في معركه قادش حموكي
وشفايفي دي اللي ما بطلتش في يوم هتاف
ده انا كل شبر في أرضك اتمرمغت فيه
وكل يوم عشتيه
أنا اتغذبت بيه

بتكرهيني عيونك السوده
وأيامي اللي فاتت
مانتيش حبيبيتي من النهارده
حبيبتي ماتت

علا صوت أدانك جرس
في الشده صاحينلك
من امتي كانوا الحرس
هما اللي باقينلك

بعتيني علشانهم
وعنيكي معصوبه
ياهلتري خاينه
ولا زيي مغصوبه

كل الكلام اتقال
والشعر بقي ماسخ
والصبر علو جبال
والظلم شيء راسخ
وطن وغرقان في النطاعه
كل شيء ريحته نطاعه

علمونا بالعصايه
ورضعونا الخوف رضاعه
علمونا في المدارس
يعني ايه كلمه قيام
علمونا نخاف من الناظر
فيتمنع الكلام
علمونا ازاي نخاف
وازاي نكش
بس نسيوا يعلمونا الاحترام
فمتزعلوش
لما ابقي مش باسمع كلامكم
وماتزعلوش لما ابقي خارج عن النظام

مستني ايه من طفل ربوه بالزعاق
غير المشاكل والخناق
كل اللي بيقولك بحبك دول نفاق
أنا لما قلت لك بحبك
كان نفاق

الحب يعني اتين بيدوا
مش ايد بتبني وستميت تيت تيت يهدو
الحب حاله
الحب مش شعر وقواله
الحب يعني براح في قلب العاشقين للمعشوقين
يعني الغلابه يناموا في الليل دفيانين
الحب يعني جواب لكل المسجونين
هما ليه بقوا مسجونين
يعني أعيش علشان هدف
علشان رساله
يعني احس بقيمتي فيكي
إني مش عايش عواله

يعني لما اعرق تكافئيي بعداله
الحب حاله
الحب مش شعر وقواله

الحب حاجه ما تتوجدش في وسط ناس
بتجيب غداها من صناديق الزباله
الحب فيك اسحاله