كراسه بتلخص حياتي وما فيها
فيها جمالها وفيها بلاويها
كراسه فيها معاني وعبر
معاني كتير متهمش البشر
تهم بس.. انسان يتيم
شايف مكانه   فالعصر القديم
انسان غلبان
عايش جبان
بيحلم بحضن فيه الامان
انسان مغلوب
انسان مرعوب
عايش حياته وقت الغروب
ملوش فالنور
مجرد عصفور بجناح مكسور
بتنهش في لحمه كل النسور  


دي صفحه فيها يوم الولاده
قال ايه بيبكي من كتر السعاده
فتح عينيه علي دنيا ساده
مسكين مش عارف حقيقه الحياه
مولود غريب مش من هنا
مش هي دي دنيتي انا
انا كنت بحلم بدنيا الهنا
مش هو ده اللي بتمناه

ودي صفحه بيكبر فيها العمر
اصحاب تهدي واصحاب تمر
بيدور فيهم علي صاحب يسر
ملقاش غير الزيف والخداع
صفحه سودا من كتر الغيوم
كلها مشاكل كلها هموم
كان نفسه يفرح بس يوم
معرفش يفرح والقلب ضاع

علي صفحه تانيه رسمه محب
كيوبيد وصل والقلب طب
والحبر سال لما اتكتب
بالحبر جمله ... راح الحبيب
حتي الحبيب هجر وساب
فالقلب جرح يزيد العذاب
لا الجرح خف ولا قلبه طاب
ولا يشفي قلبه لمسه طبيب

عالجلده كاتب نهايه حياته
طبول تدق تعلن موعد وفاته
مفيش يا عيني اللي يحزن عليه
مفيش اللي يشيل تابوته بايديه
ورغم كده القلب مبسوط
مش خايف منك يا موت
ده انا من يوم ولادتي بصرخ باعلي صوت
عايز اموت ... عايز اموت