بحلم ومفيش في ايدي غير كده
بحلم ما هم حرموا ده وده
مبقاش في ايدي غير الحلم الجميل
يا عم احلم ما هو علي قفا مين يشيل
احلم قبل ما يتخصص
ده الحلم جنب اخواته مترصص
بس اعمل قرد واقعد اترقص
برضه مش هتحقق الحلم

مكتوب علينا نعيش فالخيال
مكانك مش عالارض ده فوق الجبال
احلم براحتك ومش هيمنعوك
احلم انك عايش بين الملوك
المهم تبعد عن الحقيقه
خليك في مشاعرك الرقيقه
سيب لهم الدنيا الخنيقه
وخليك انت فالحلم

دي حكايه راجل بسيط
اسمع وافهم .. هيص وزيط:
في يوم حلمت بعالم تاني
وفضلت احلم ونسيت زماني
حلمت بعالم كله حنان
حسيت بحب وعشت في امان
حسيت بطيبه
يا عم بلا خيبه
الطيب فالزمان ده بقي انسان ضعيف
انسان مريض انسان كفيف
كل اللي بيشوفه خبال هلاس
عمره ما بيشوف اللي بيشوفه الناس
بس طول ما انت قاعد في حالك
متشغلش بالك
وخليك انت فالحلم

طب انا هثبت لك ان الحلم هيبقي حقيقه
واكيد فيه الف طريقه وطريقه
الراجل اتجنن يا جدعان
حلم ايه بس اللي عايز يبان
خليه مستور
ميشفش النور
ده الحلم مدفون في اعمق البحور
نزل الراجل يكلم الناس
انا حلمي عايز شوبه احساس
فيها ايه لو رجعنا نحب بعضنا
فيها ايه لو رجعنا نشغل قلبنا
هنعيش في سلام هننسي الحروب
هنرجع زي ما اتولدنا من غير عيوب
وده واحد بضحكه خبيثه مش عايزه تبان
ابعده عنه مش ناقصه جنان
واللي يقول مسكين
واللي يقول اطلبه مستشفي المجانين
يا عالم ياهوه انا عاقل مش مجنون
انا عندي حلم هيغزو الكون
الراجل يا عيني من كتر الحماس
عقله خف واتجنن خلاص
ودي كانت نهايه الراجل البسيط
فهمت يا صاحبي ولا ... هتفضل عبيط !!!