كان نفسي ابقي رسام
كان نفسي محتاجش لكلام
اعبر عن اللي حسه
بس بفرشاه وشويه الوان
كان نفسي ابقي طيار
كان نفسي ابقي بحار
ابقي شاعر واملي الدنيا اشعار
او حتي ابقي واحد من الثوار
كان نفسي ونفسي ونفسي
ابقي اي حد الا نفسي

كان نفسي ابقي جنايني في جنينه من غير حدود
امسك خرطومي واسقي الورود
اشوف الحبيب بعين الحسود
وهو مع حبيبته ام الخدود
اهي دي عيشه عال العال
تنفع قصيده او حتي موال
عيشه رايقه
عيشه عايقه
مش عيشتي بنت المتضايقه
عيشه مدفونه تحت الرمال

وفي يوم صحيت علي صوت مهول
ابواق تزمر مع دق الطبول
اصوات تقول اصحي يا انسان
اصوات لناس اشكال والوان
وقفت اسأل انتوا ايه¿!!!
قالولي احنا اللي نفسك فيه
احنا البحاره والرسامين
احنا الشعراء والطيارين
وواحد بقوه وبأعلي حس
يصرخ يقول قرب وبص
تعالي اختار حياتك بايديك
وبكره هترجع بدمعه عينيك
تقول يا ريت اللي جري ما كان
لو بس ارجع زي زمان
ارجع لحياتي اللي اتولدت عشانها
دي حياتك رساله ولزمن تكملها
علي كل حال من غير ما تحتار
تعالي ارمي بنفسك فالنار
وتعالي نقي وتعالي اختار

معانا طيار .. كائن شريد
مقضي حياته دايما وحيد
واهو طار ورفرف فالفضا
لحد ما العمر انقضي


ومعانا جنايني ماسك خرطومه
علي كده من الصبح لاخر يومه
يرجع يستريح ما يلاقي فرشه نضيفه
علي كل اهو راضي بحياته السخيفه

استني يا عم ده الجي احلي
ياللي شايف حياتك دي واحله
معانا لسه شاعر تمام
حابس حياته في شويه كلام
ولا له صديق غير بنات افكار
افكار غبيه اتعملت اشعار
لراضي هو باللي كاتبه
ولا اللي كتبه راضي بيه

يا ابن ادم صحصح
قبل ما تحلم وقبل ما تسرح
فكر شويه وشغل عقلك
ده عقلك هديه من ربك
ربك خلقك برساله لازم توصل
وهتوصل مهما يحصل
دي حياتك متعه حصريه
ده لو قعدت تدور سنين ضوئيه
مش هتلاقيها في حياه حد غيرك
فاصحي بقي وحكم ضميرك
نصيحه بقدمها لك
لو قاعد تدور علي ميزتك
ميزتك لوحدك .... هي نفسك