فتحت صندوق ذكرياتي
لقيت ورق ومعاه صور
دورت فيه علي حياتي
لقيت حياتي قصيره
وفتحت ورقه لقيت جروح
بصيت في صوره ياقلبي ماتت من سنين
لقيت الم صحي وناداني الحنين
وسرحت في الصندوق بدور فيه
علي ايه ¿ علي لحظه فرح كانت معايا
كانت معايا في البدايه
كانت معايا من البدايه للنهايه
وقبل النهايه لقيتها
لقيتها بعد سنين حزينه
لقيتها جنبي سنين طويله
وانا اللي علي عيني الغشاوه
مش شايف ۔ مش عارف
كانت في بعدي سعيده ولا حزينه
بس السعيد بيبان عليه
بتظهر فرحته في عنيه
بيفرح كل البشر حواليه
ولما لقيت الناس جنبي بيشتكوا
بصيت لواحد بصيت كتير
لحد ما عيني دمعت
بصيت لغيره لقيت وشوش الناس مرايه
مسحتها بدموعي
لقيت قلوب الناس حزينه
والحزن في وشوشهم ايه
بكيت علي نفسي علي طفولتي وصبايا
رفعت عيني للسما وناديت يا هادي
لحد امتي يعيش الحزن في قلوبنا
لحد امتي تسيل دموعنا
لحد امتي هايعمينا ظلام الليل
وليلنا طال وبعد كل ليل نهار
نهار بتطلع شمسه في السما منوره
نورها يملا قلوبنا فرح وهنا
لقيت شويه نور في قلبي
وعرفت ان ليلنا طال
ومهما طال هاتفضل قلوبنا دايما في انتظار
لان بعد الليل دايما ييجي النهار
لان بعد الليل دايما ييجي النهار
