نفسي أرجع زي زمان
شاب صغير هيمان
أصحي وخري مزاجي مش كئيب
أضرب فول وشاي بحليب
أقف قدام المرايا
أتزوق ولا الصبايا
جينز ومارلبورو وجل
وأستني المزه في الضل
مدرسه البنات اللي في الميدان
أقابل قدامها حنان
بت بنت بلد دلوعه
لكن رافعه مناخيري وممروعه
أبوها موظف كبير
في سفاره البرازيل
وأمها أبله رباب
مدرسه الألعاب
المهم قولولي وصفه
ترجعني وتخليني أصفي
وأرجع واد أمور
وألف ولا الدبور
من السنيه للبنات
لقهوه عم عرفات
شويه روشنه شبابي
وأرجع أفتح بابي
من غير نظارتي كعب الكبايا
ولا قهوتي اللي بتاخد عزايا
نفسي أرجع زي زمان
وأنسي الغربه والحرمان
الغربه عملت شقوق
في قلب جلدي المحروق
بنار البعد عن بلدي
وعن أهلي و عن ولدي
يااااه عليكي يا غربه
لما بتبقي كربه
وتطفي أحلي السنين
وتقيدي الشيبه والحنين
تفتكري هرجع صغير
وأعيش اللي فات وأتغير
أنا نفسي يا ناس
