القاهره عيارها فلت وباظت
وتقول لها عيب تقول قول يا باسط
ماشيه بتتأصع بجيبه قد الكف
ونسيتها جمالها في الملايه اللف
بتقلد خالتو أمريكا
وهي في الأصل الفابريكا
خلفت عرابي والنديم
والست ثومه وعبد الحليم
وعمو نجيب وزويل
وكارم اللي متعنا بى يا ليل
القاهره اللي كانت مناره
دلوقتي كلوب في قلب حاره
لا نوره أنتشر وغمرنا
ولا نور قلب دارنا
يا عيني عليكي يا قاهره
يا بنت المعز يا ساحره
كنتي زمان وكنا معاكي
نعلي ونطير في قلب سماكي
دلوقتي بقينا صغيرين
وكبارنا هما الدفيانين
بعزك انتي أتمتعوا
وعلي زلنا أتمطعوا
وكأننا جايين لهم
سخره ننضف تحتهم
الفرق مش كبير
بينهم وبين الحمير
لكن حمير فايف ستار
تمص دمنا بالقنطار
وإحنا يا حسره علينا
بس نكتب ونمد أيدينا
لأمتي يا حلوه الهوان
يا ست العصر والزمان
نفسي أشوفك يا بلدي
بجلابيتك أم سفره البلدي
زي زمان وقوره
بمنديل بأويه وأموره
وترحه سودا مقصبه
ماشيه بيها متعصبه