حىواديىت عىاشىىق

مانيش حلمك
ولا البطل اللي في الحكايات
مانيش طيرك
ولا النغم اللي في الكلمات
أنا عاشق
وعشقي مات
من امبارح
ومن أول ما ضاع الحلم
ومكتوبه علي بابي
حروف الأهه مكتومه
بتنزف دمعه مخفيه
أنا عاشق
وعشقي حروفه منفيه
في وطن الحسره
في النسيان
غريب مالهوش جنسيه
وحيد محتاج لحريه
بينده والندا خايف
يتوه في السكه
ما يعديش
أنا عاشق
وعشقي قلب درويش
حزين مالهوش في الأفراح
يغني "ع " الربابه الأه
دواه في الداء يا أواه
وشجن الناي
جوه حشاه
أنا عاشق
وعشقي بلاد
ماهيش ليه
قصيده شعر مجنونه
ومرسومه علي جدار
الليالي السود
ورده صغيره مجروحه
بخنجر غدر مسموم
طعن ضحكتها
سال الدمع
علي وش القمر انهار
أنا عاشق
وعشقي كان
أنا عاشق
وكان ياما كان
ولد بيحب حدوته
بترعي فيها بنوته
بتتلاعب مع العسكر
قعد يسكر
علي قبر البنات
الحلم