وعرفاني
أنا منك
وموالي بيحكي في الهوي عنك
بيحكي قصه حيرانه
بتنده في الطريق الحلم
تلم حروف بتتسرسب
علي الدمع الغريب اللحن
أشوف حدود معالمها
تروح في العتمه شيلاني
********
وعرفاني
وعارفه إني أنا خلك
وعارفه كمان بشاورلك
علي الجرح القديم
في السر
علي الجرح الجديد
في الهجر
علي الكلمه اللي غرقانه
ومش عارفه طريق البر
علي الصمت اللي شل لساني
وعرفاني
وعارفه بكام صبح دمك
بلقمه عيش ومحروقه
علي عصب الولاد السمر
برسم مريض علي
كل الوشوش الحمر
بهزه وسط مجنونه علي الريالات
بمنديل كلينكس مستعمل
بعقب سيجاره "كليوباترا"
بحق "كاكولا " مش كسبان
بتذكره قطر عداها
بقزازه كحه مشروبه
بعلبه سمنه مقلوبه
بكاس من بيره مغشوشه
بعشره طاوله مهزومه
بعضمه فرخه مرضانه
بعود كبريت قشر البيض ...
بضحك عبيط ...بفتله خيط
بذره ملح ... بنقطه زيت
بكلمه رخيصه مرميه
علي جنب الرصيف في البرد
بدمعه حرقه حضناني
وعرفاني
وعارفه ازاي بقي حالي
وأنا مرسوم علي بابك
حزين مستني لجوابك
مجنون في الحب والبلوي
سنين مشتاق تضميني
وتحكي لي عن الشاطر
وست الحسن
صغير يا حبيبتي
مش قادر علي شيل
التقيل "م" الحزن
غريب يا حبيبتي
مش عارف ألاقي
لضحكتك عنوان
طريد يا حبيبتي من كفك
ونفسي أبطل التوهان
صغير محتاج لحكاويكي
ولكن فرغت الحواديت
وصار الشاطر الفارس
بليد مركون علي الحيطه
وست الحسن حيرانه
بتخدم صاحبه الزيطه
وأنا لسه بقول الحلم
وأقول دي حبيبتي
شرياني
*******
وعرفاني
وعارفه إني أنا مهزوم
من الوجع اللي فارد
كفه علي قلبي
من النايمين علي فرشي
بأمر الغول
من الخوف اللي بقع
لونه في عبايتي
من الترابيزه والنايب
من الكراسه والواجب
من الابله اللي عطياني
دروس ع الحجر ساعه الليل
من بنت الجيران والسهد
والولد اللي قصده الكيف
من عصر انفتاح الست
"ع" الغجريه والهوسه
من البحر اللي خان الشط
وباع نسماته علشاني
*******
وعرفاني
وعارفه إني مش غجري
ولا والدي زعيم كداب
ولا شيوعي ولا ثوري
ولا صورتي علي الأفيشات
ولا عنتر ولا بيبرس
ولا أبو زيد
أنا مكتوب أكون إنسان
وعنواني أكيد منسي
كما العناوين
أنا ملاح في بحر الحلم
مش عارف أمان الشط
أنا دمعه في عين الضعف
مخفيه في بير الصمت
أنا مولود ورا الكواليس
في مولد صاحبه مش فايق
أنا عاشق علي الموال
حبيب بيحب ما يطولش
عشان بيقول ولا يخبي
أنا سواح
وضاع عنواني علي يدك
بطوف في الليل
ومش عارف طريق الصبح
أنا مداح هويت صورتك
بغني يا ليل يا صاحبي
وأقول يا عيني خبيها
ولا تبوحي بسر الحلم
وسيبي ايديها تحضني
وتسكن جوه وجداني
*******
وعرفاني
وعجباني
لما تفك ضفايرها
في وش الشمس بتجنن
ساعتها بطير كما العصافير
وأبوس الحلم في جبينها
ساعتها بكون أمير مفتون
وأحني الفل في ايديها
بحبك ياللي محبوسه
في بحر النمل والعقرب
بحبك بالسكوت المر
بحبك همسه من قلبي
بحبك صرخه من جدي
بتقطع يد من سرقوا
بحبك وارتعش لما
بتيجي يدي فوق الجرح
بحبك واعشقك كلك
وأقدم دمي ده مهرك
وحلمي عقد علي صدرك
بحبك زي ما تكوني
عجوزه تلمي أحزاني
صبيه تملي أحلامي
قديمه...دميمه وعنيده
أميره ...جميله وغنيه
عزيزه ...مهانه ... منسيه
كريمه وخاينه ووفيه
بحبك غنوه ورديه
لغيري تكوني أو ليه
بحبك ملحمه عاشق
تعيش في قلوب بنات الحي
بحبك وأرسمك لوحه
تىىتوه موناليزا
في التفاصيل
بحبك وأزرعك ورده
في كف الحلم عشقاني
*******
وعرفاني
وعارفه إني ليك هاموت
بحلمي جوه بحر الصمت
بشعري بره بطن الحوت
هاموت لما يبقي الليل غطاكي
في الشتا "م" الغدر
هاموت لما يصحي الصبح
علي صوتك ينادي النور
صباح الخير.........
صباح النور.........
صباح بيهد قلب السور
هاموت لما يمشي النمل
بعيد عن بني العصافير
هاموت فوق ايديك وصدرك
وأنا واقف بحني الحلم
هاموت وازرع الكلمه
علي قبري شجر أخضر
هاموت يا حبيبه
ويمكن تكوني لسه
فكراني
وعرفاني
