الجنازه
الليل شبح...!!
منقوش علي كل الوشوش
الخوف بيتحدي الجيوش
فمتتعبوش...
وتحاولوا تعديل المسار
لا .. انتصار
للي ارتضي يوم الخضوع
للي ارتضي يوم المهانه ولستكانه والخنوع
للي ارتضي انه يموت
دافن حركته وكلمته جوا السكوت
تحت البيوت الميته
كل المواسم شكلها اصبح شتا
طالعه الجنازه بس ليه مش ملفته
يا ايها الميت هناك ...
يا ايها الميت هنا ...
لو كان كلامي هيجرحك
اسف انا
الحق لجل ما ينتصر محتاج لميت مليون سنه
فبلاش تموت
يا تموت مفجر الف دانه فى سكتك
يا بلاش تموت
يا تموت تصحي الميتين من صرختك
يا بلاش تموت
يا تموت محرر غنوتك مع ضحكتك
يا بلاش تموت
يا ايها الميت هناك
واقف بترمي ليه حجر
وبترمي ليه روحك هدر
فاكر حجارتك يوم هتصنع معجزه
فاكر اذا ....
شفنا الكفن راح ننتفض
حتي الدموع جوا العيون متتعززه
يا ايها الميت هناك
كل الخلايا فى جتتي متنرفزه
صورتك بدمك في عقول كل البشر متبروزه
فى لمين بتعلن لنتفاضه ولحتجاج
كل العيون ملت خلاص من رؤيتك
كل الودان تعبت خلاص من صرختك
كل القلوب مفهاش مكان
تحزن تحن لمحنتك
فلمين بتعلن لنتفاضه ولحتجاج
يا ايها الميت هناك
يا تموت شهيد....
ويموت قصادك الف قرد من القرود الاغبيا
يا بلاش تموت
محناش ف عهد المعجزات والانبيا
علشان حجر يصنع لوحده الانتصار
عمر الشهاده والبطوله في يوم ما كانوا انتحار
عمر النهار.... ما هييجي صدفه لارضنا
يا ايها الميت هناك
لو كان كلامي جرحك
اسف انا.... اسف انا ....اسف انا
بهاء توفيق