كله تمىىىىىىىىىىىىىىىىىىىىىىىىىىىىىىىىىىام
 
تموت الشمس و الحافي حيصرخ ليه ¿!
حينطق إيه ¿!
نروح للأمس و نقلب
و نتقلب ... و نتغلب
يا تنكسر ... يا نتحسر
و من صمتي بيتبخر و يتنتر
حروف و كلام
و كله تمام ....... !!
و يجي الأيزو ويا الجات
ولاد وبنات
لا فيه شغله و لاحكايات
و حنصدر بلح أمهات
و أستورد لأمي الديك ... و دي صرخه
و أستورد لابويا فريك ... مع الفرخه
و أستورد لشعبي شريك ... بلاش نفخه
يزغزغنا ... يدغدغنا
يعشينا بأي غموس
و يتشطر و يتمنظر
مفيش ريحه و لا منظر
و أنا اتكسر ... و أتحسر
و من صمتي بيتبحتر و يتنتر
حروف و كلام
و كله تمام .....!!
و دا محافظ ... منين ما يروح
هموم الناس ... تزيد و تفوح
" علي الأحمر " ... يموت مجروح
حنقرا عليه يس أو نوح
يس الطوب ... بيتألم
يقول المد يتلملم
تشوفه الصحرا تتندم و بتبلم
و ناس تبكي و تتشكر
و ليه دايما بيتنكر !!
و يقفل بابه و يسكر
و يتحجر و لا يكبر
و يتكبر .... !!
و أنا اتكسر و اتحسر
و من صمتي ... بيتبحتر
و يتنتر ... حروف و كلام
و كله تمام ......!!
ودا مسئول قطاع أعمال
نضيف المخ ... خالي البال
مس و صباح يقول تخصيص
و ناس بتموت و ناس بتهيص
و ناس عايشه  و لا البلا ليص
مناها المحشي و القراقيص
و ناس تتعشي بالكفيار
و تحلم  بس بالمليار
و لسه سنين حنستني
عشان الحلو يتهني
و يعلا لفوق و يتغندر
و أنا أتكسر و اتحسر
و من صمتي بتبحتر و يتنتر
حروف و كلام
و كله تمام
انا حافظ كتير أسرار
و دا محافظ مالوش أفكار
بيصحي الفجر يتمطع
و يتنطع ... و يتطلع
و بيطلع عشاني قانون
مفيش أمن و لا من مأمون
مفيش حارس و لا محروس
نقول  بحري ... يقول قبلي
يزيد حيرتي ... يزيد غلي
يا رجله تبوس
يا أما يدوس
و أنا اتكسر و أتحسر
و من صمتي بيتبحتر و يتنتر
حروف و كلام
و كله تمام .......!!