يا رايح عند أيامي
سلامي توصله ليها
دي واحشاني
وحايشاني ظروف إني
أعيش فيها
برغم اني ماليش تاني
سنين في العمر
اقضيها
ورغم القلب شاخ بدري
ورغم جبال علي صدري
وباجري لحد
لا أدري
لفين الخطوه واخداني
واناديها
وتوحشني ..
واتحايل أبات مره
في أحضانها
وترفضني
وتبعدني وتطردني
كإني ما عشت يوم فيها
يقولوا العشره ما تهونشي
طب اشمعنا ¿¿
انا وايامي عشرتنا
بتنكرها
ولما بشوفها
ضاحكالي
تداري الضحكه عن عيني
تخبيها
وترسم لي بدل منها
سراب ذكري
وفكره تكره الفرحه
في لون بكره
وانا اكره سنين خوفي
واخليها
مدار اسبح في افلاكه
وأسلاكه تكهربني
فاموت واقف
واتكفن
بلون خوفي
واخبي الدمعه في حروفي
واروح عند اللي فاضل لي
من الدنيا
يقوللي خلاص
لا ناس تسمع
ولا أيام ولا فرحه
عينين سارحه
وبال شارد
وفارد ع السنين توبك
ومكتوبك تموت خايف
لا عارف تحضن ايامك
ولا الأيام
بتشتاق لك..
