مين اللي علِّم غنوة الأفراح شجن .. ؟؟ أو مين فتن للحزن عن ضحكة عينيك ..؟؟ مين اللي خلى الفرح جواك اندفن وضحك عليك ..؟؟ انت السبب .. انت اللي ماشي ف دنيتك من غير عنين .. وانت اللي مربوط من سنينك في العدم .. ومسلِّم الأيام إيديك .. من كام سنة لما اتفتح لك ع الفَرَح شبَّاك في بيت .. لميت عزالك جوَّه بالك واللي باقي من آمالك وانتهيت .. خبيت ملامحك بين تفاصيل غربتك وبعدت ليه؟ حطيت سؤالك في انشغالك باللي جاي وسكتت ليه؟ إنت السبب .. إنت اللي راسم ع الحيطان صورة غروب .. انت اللي بتحب الهروب من فرحتك .. وانت اللي ماشي ف سكِّتك بتبص فوق .. ماتلومش غيرك لما تتكعبل ف موت او لما تحضن خطوتك لحظات سكوت أو لما ترجع كل ليلة بكوم هموم من غير سبب .. انت اللي حابب تنتهي وانت اللي كنت بتشتهي رغم الفرح لحظة شجون .. خليك حزين خليك مضيع وقتك الفاضل شجن بس افتكر العمر لو يوم انتهى .. ما بيبتديش .. دبي 4/12/2008