الله عليك
علي قلبك المرسوم وطن
تمليك
علي لون عينيك في الوجع
صفصافه
بتحاوط علي وشوش البنات
حواليك
وتبوس " ضحي "
لما بتتشعلق بحلمها ف رجليك
والكبرياء علي وشك " الشامي "
رغم ان سيف الوجع
ساعه الوجع حامي
الله عليك
.............
الله عليك
لما بيتعالج دواك
بالبسمه بين شفتيك
وتحاصر العله مابين
تجعيده الوش البشوش
وملايكه الرحمه
وتمدد الجسد اللي شايل
م الزمن
مليون زمن
وسنين أسي
كله اتنسي
في زحمه الملايات
تعليقه " الكالونه " ف وريدك
الحكايات
ضحك البنات
علي بابا جدو
وبوسه السيما
وحكايه الشاطر حسن
" احمد حسن "
إسراء ومريم يدوبوا
بين ثنايا ايديك
يسري الوجع فيهم
فتبوس جبينهم
بنظرتين في عينيك
الله عليك
.....
الله عليك
علي خطك الكوفي
ونقشك الفوانيس ..
علي صبرك النيلي
ف اياتك الاحاسيس
الله عليك
ياعود ريحان
طارح علي ارضي
الشراقي
يافرع من نيل الوفا
رايح .. وباقي
ياشمس ماتعرف تغيب
يا طهر أطهر م الحليب
يا عندليب
وحياه نبينا المصطفي
طه الحبيب
لو كنت ناوي ع السفر
ابقي افتكرنا
الله عليك
....
