ماشيين
لابسين أيامنا الحلوه
وقميص عبدالناصر
تحت ليالينا
العرقانه بملح وذل
بىتىدوس الخطوه
ف كرامتنا
ومن شهامتنا
بنتزحلق
رافعين الرايه البيضا...
والرايه السودا
فوق سرا يرنا
بنحلمها .
ماشيين ...
في طابور السير
- الله يمسيه بالخير-
لسه فاكرنا
بنغني ساعتين
في العمر
وباقي العمر
يتغني علينا
....
ماشيين
من ( راس بستان الاشتراكيه )
عدينا ع البر التاني
وأغاني النصر
معديه
ووصلنا خصخصه الميه
ورصاصه ف جيبنا
مصديه
...
ماعادتش بتفرق
لو قسمت رغيف العيش
ع الاتنين
أو ع الستين سبعين مليون
ماهو نص رغيف العيش
محجوز للجيش
والنص التاني
في بطن شاويش
والنص التالت
والرابع
والخامس
بح .... ما فيش
.....
ماعدتش بتفرق
مش فاضل
من عشق جمال للثوره
غير عشق جمال
ولا فاضل
من احلامنا بالحريه
وبالقوميه
غير احلامنا
مش فاضل
من دعوه أم
ساعه فجريه
علي الحكام
وطابور العيش
غير الحكام
وطابور العيش
....