التلاته في كل حته
والقماش في الجلابيه
منه تعمل ميت جاكته
والكلام موزون بمعني
مش بكيلو
أو بالته
أو معبي ف بطرمان
....
التلاته في الديانه
كان يهودي
ولا مسلم أو مسيحي
كلنا شايلين أمانه
والامانه من الأمان
.....
التلاته في العلم
لونه لاحمر دمنا
لونه لابيض حلمنا
لونه لاسود م الألم
فوق الحيطان
.....
التلاته سنين طوال
عاشهم القائد " جمال "
بعد نكسه خمسه يونيه
كان بيحلم بالقنال
والعروبه تضمنا
فكروني لما قالت
(لسه فاكر   كان زمان )
.....
التلاته سبعينات
سينا ندهت للسادات
قوم يامصري وضمها
بوس ترابها الكهرمان
جابها
ضعنا
وبيعنا فيها
والمعاهده لسه شاهده
ع اللي كسبان الرهان
....
التلاته بسنتين
( يابهوت الطيبين )
فين بهيه يا أمين
تحكي
مين فينا اللي خان
...
التلاته بشرطه مايله
والجثث ع الارض سايله
واحنا ماشبعناش
محايله
في اليهود والامريكان
.....
التلاته
اضرب في تسعه
يطلع الناتج سنين
ناس بتاكل فيها
والعه
واحنا قال   مستنيين
كل حي وله أوان
....
التلاته أهرامات
" خوفو " حالف
مش حيمشي
" خفرع "
ال مش عاجبه يمشي
" من قرع "
أو " من وريث "
كان " إيزيس "
أو " أوزوريس "
طبخوها يا برلمان
...........
التلاته في مؤتمرهم
اللي باقي من ضميرهم
راح في غزه وف اريحا
كلنا ف نفس الفضيحه
بس واقفين " مانيكان "
.....
التلاته
عز بيتنا وعز ابونا
عذبتنا وعذبونا
ليه بنرضي بالمعونه
( دوخينا يا لمونه )
واعصرينا ف كاس هوان
.....
التلاته
جبتهالكم ع البلاطه
قولوا
( حد اتنين تلاته )
جمله في غايه البساطه
كونوا مره فاعلاتن
كونوا مره قلب واحد
نلتقي بعد الادان
....
اتصل برقمنا يمكن
تكسب الجايزه الكبيره
زيرو الف وتسعميه
بعدهم
خمسين تلاته
شيلوا واحد م التلاته
نلتقي بعد الاوان

.....