يا عم موت
وارحمنا من ذل السكوت
عشش علي وشوش الوطن
العنكبوت
والعن مغاوير العرب
اللي سابوك
في حصارك الملكوت
....
( رام الله ) مش هيه الوطن
رام الله فخ
وانت ارتضيت
سن الخازوق
بين يوم وليله
لما الوطن بيك أتملخ
أه يا جبل
أه يا جمل
كان رمز   لرموز الزمن
وف ثانيه نخ
...
الموت أحق من الحياه
لما الجباه
تحني كرامه عشقها
هذا الثري
يا هل تري
لساك جبل
ماتهز فيك الرياح
يا هل تري
ضحكوا عليك العرب
ومن الرياض للقاهره
منصوب كمين أفراح
وف شرع مين
كان الدولار هوه المزار
وف شرع مين
الشيخ ياسين
مصلوب علي كرسي الوطن
مشلول
مبدور تقاوي   ع التراب
يروي بدماه
عطش الصبايا المجروحين
يفضح أكاذيب اللي تاجروا بحلمهم
الحاكمين
المحكومين
الخاشعين
الراكعين
الساجدين
علي باب نبيهم
( جورج بوش )
يستغفروا ذنب العروبه
ويطلبوا منه السماح
دابحين كرامه شعبهم
ومقدمين قربان محبتهم
لهذا المنتظر
...
يا شعب واقف تحت رحمه
الانكسار
الصمت عار
خد خطوه مره للأمام
وارفض وصايه العاجزين
....
فتح وحماس
مش همه حراس الوطن
مش همه دم الشيخ ياسين
ولا دم طفله استشهدت
ف رحاب جنين
خد خطوه مره للأمام
حاصر حصارك في رام الله
وموت فداه
وازرع وطن في القلب
يطرح لك حياه
فجر غضب كل العرب
ح تلاقي إن الضرب في كل اتجاه
قاوم... وجازف... وانفجر
دا الموت أحق من الحياه
....