مفتتح :

أنا الفلكي
أشوف البرج للملكي
وللميري
واراعي الكلمه
وضميري



- الحمل -
ونقسم فيما بيننا رغيف
ونتشتت
بيوت ورصيف
ونتعاهد علي الغربه
فنتجمع في أحلامنا
نزيف بينز منه نزيف
- التور -
نغمي عيوننا
وندور سواقينا
بريق عطشان
نلاقي الأرض
بتطبطب وتسقينا
حنين وأمان
وتحدفنا شوادفنا
فنركب نورج الأحلام
وندرس غله الأيام
ونتجمع سوا في الجرن
ويبدأ مشهد الإعدام
- الجوزاء -
تهلي علينا فرحانه
بلا حراس
تضمينا
تلفينا مع الطرحه
حوايه راس
وفوق منها
العطش زلعه
ونتمشي
لحد مانوصل الترعه
ونتوحد
كما الطينه ف شقوق كعبك
ونرجع بيكي
مرويه
لحد الباب
فتنبح في اثٓرنا كلاب
ونجري بعييييييييييييييد
لحد حدودنا
مع شعبك
- السرطان -
وفي الدواربيتجمع
عمد ياما وشيوخ ياما
بيتعشوا
ويتسامروا
ويشربوا شاي
يبيعوا في أرضهم للرايح
يبيعوا في عرضهم للجاي
وع القهوه اللي في المركز
خواجه بيبعت الرايح
خواجه بيستلم م الجاي
- الأسد -
علي حدودك
عساكر بيضا مرصوصه
وعساكر سمر
وفيل مع طابيه
محبوسه
ف هياكل قصر
ملك ووزير بيجمعهم
خريف العمر
وكان بينهم حصان جامح
لا يعرف خوف
ولا يسامح
بيرمح بين تجاعيدك
يصحينا بأناشيدك
وبينادي
صلاح الدين
- العذراء -
ماعدش مابيننا
يامريم
مسيح تاني
يجمع في الرجال كالطير
ويحييها
بقدره ربها
فتكون
ماعدش مابيننا
يامريم
عصا موسي
يقف بيها
قصاد فرعون
ولا عدل النبي طه
لعله انت عارفاها
بقينا بجهل حكامك
عدد في ليمون
- الميزان -
ويا مريم
رسمتك صوت
بلا صوره
لعصفوره
تزقزق فوق ضلام الليل
تصحي الفجر في عروقي
وتتشعلق
علي قلبي
وتنحت فيه بمنقارها
خريطه حلمنا المبتور
وحالف يوم ما ح اوصل لك
لاصلي الفجر في بغداد
واصلي الجمعه في الأقصي
واصلي العصر في بيروت
ونفطر تمر ع الضفه
واصلي فرضك السادس
واحج واموت
- العقرب -
رميت وجعي اللي متوشوش
علي منديلك المفرود
وقلت احكي لي عن بكره
لمحت ف عينك المكتوب
لمحت الزلعه مليانه
عرق جيلك
وع الترعه
كان القاضي
وشيخ منصر
لمحت الجرن كان فاضي
وكان مليان
عساكر بيضا م البندر
ومابتقراش
لمحت في مشهد الإعدام
قصايد بيرم التونسي
وفؤاد حداد
ونجم في ركن
كان سارح
وعم امام
وجف النبع من نيلك
- القوس -
لمحت المسجد الأقصي
بيتتاوب
علي نومه شعوب شقيانه
في اللقمه
لمحت الكوفه والبصره
علي القهوه
مكان الكومي والبصره
لمحت الحزن في غزه
وصل بيروت
لمحت التوت
وسجاده صلاه دايبه
لمحت سلاح في ايد عيل
بيضرب طلق
يوم العيد
بييجي العيد وبنعيد
وننسي ان احنا لسه عبيد
- الجدي -
عشان نقدر نكون احرار
لابد نكون من الثوار
عشان نقدر نكون ثوار
لابد نكون من الشعرا
عشان مانكون من الشعرا
لابد نرافق الكلمه
ولما نرافق الكلمه
ح نتجمع في زنزانه
ونتدبح .....
نعيش احرار
- الدلو -
( بلاش نضحك علي روحنا )
ونبكي ع اللبن وننوح
وندفن راسنا في الرمله
ونستني عصا موسي
ونستني سفينه نوح
- الحوت -
ولا تخافي
لأن الفجر جاي صافي
وشمسك فارده في جناحها
علي غيطانك
كما المارد
فلمي بناتك البكر
ولمي ولادك السكر
ولمي العجزه والرضع
حواليكي
وحلي ستايرك الدهبي
علي كتافك
ماتجدليهاش
وفكي البسمه في شفايفك
ماتربطيهاش
وصلي فرضك المنسي
وماتصلاش
معايا
أو مع يونس
في بطن الحوت
.......
- أنا الفلكي -
بحبك في النسيم همسه
واحبك في الشتا شمسه
وابيع عمري فدا لحظه
ايدينا فيها يتلامسو
اكيد مره ح نتلاقي
ورب الكعبه يامريم
رومانسيين
ح نتلاقي
ومنسيين
ح نتلاقي
......