النص واقف فى الشمال ...
العرض شغال فى اليمين
اتخانق النقاد سوي ...
اتخانق المتفرجين
تقسيمه تشبه قتل سيدنا الحسين
تغريبه من عهد الهلالي
ف الف ليله والف بحر والف كلمه والف حرف مفردين
مع الف فكره بتتخنق جوا الصدور
كان السيناريو والحوار وجميع شخوص العرض .....
واقفين ف الطابور
الارض بتفرق سكك
الشمس بور
العتمه ما بتفرقش ابداً بره او جوا القبور
فاستسلمي يا نفس ليا وابدائي حاله كمون
جسدي المهيأ للسكن اصبح مهيأ للسكون
طعم الجنون لساه يا موت متملكك
اطلق بخور عريك علي كل الملا من غير خشا
كمل طقوس الانتشا واشربني كاس
لملم حدودي كلها من راسي ولحد المداس
اصلبني بين المستحيل والممكنه
علقني بين اللا مكان والامكنه
لسه الدروب السد مستنيه نور
***
مزج أخر :
اغزلني معزوفه بكا للصيادين
الحزن دمي وغنوتي ....
الحزن وسط الكفر دين
البحر دوره ماهوش محدد ع الورق ....
من حقه انه ينسحب لو حس ان الدور مهين
للبحر شخصيه نبي ....
وبلدنا بكر عروسه بنحنيها ليه
فيمد يلمس جسمها كله بعينيه
البحر مدد جسمه يحضن شطها ويحل ضفايرها بأيديه
حاول يفك طلاسم المجهول هوي
ما ضل صاحبكم وما - ابدا -غوي
لكن دوره بينتهي قبل الولوج
فسشد نفسه وينسحب ..!!
مشهد خرافي بتصنعه حاله غضب
وانا كنت فاكر انه حافظ دوره صم
الكادر اصفي من الفضي
لكنه كان مصبوغ بدم ..!!!
****
مزج ثالث :
تعبت شواشي النخل من برد الشتا
فاتقرفصت جنب الكانون ...
تتلقي من صهده الدفا
كان الكانون طيب قوي
خاف ع الشواشي لتنحرق
اختار تعيش....
واختار لنفسه الموت
........... طفي !!!
****
قطع مفاجئ :
للعلم بس ...
الشمس لونها رمادي مش بمبي
قلقانه تظهر تختفي جنبي
***
مزج اخير :
الحلم تكعيبه عنب علي كل دار
الحلم اقوي من الدفا /البرد/الليل /النهار
الحلم شباك للسما
مرجيحه بتطوحنا فوق
من خاف من الحلم اتحرم
تلاقيه يفوق
الشمس دورها يبتدي ....
فترش حبه ضي علي وش القمر يتهد
سلم خشب .... علي سطح بيتنا .... فى حاره سد
