يا وطن ليش بلحمك ينهشون
بيا دستور هذا الفعل مكتوب و بيا قانون يتبرر
باعوك علي جم كرسي بمجلس النواب
و شويه ورق اخضر
علي يا مله السني ديذبحوه
وبيا ديانه الشيعي يتهجر
و بيا تشريع دم المسيحي حلال
و بيا مذهب بيوت الله تتفجر
اذا اسمك عمر بيتك يهجموه
و يذبحوك اذا هويتك تقول الاسم حيدر
هيج المناصب تخليك الوطن تغدر بيه
تذبح اطفالك و بظهر اخوتك تزرع الخنجر
لو هيج الوكت خلاك بدون احساس
لو هيج الورقه تخلي القلب يتحجر
كتلوا الفرحه و بقت دمعه الايتام
بقه البارود و راحت ريحه الورد و العنبر
و صار الفرح بس بالطوبه نلكاه
و عالبسمه صار البشر يتحسر