لاجل ما تعيش السواقي
بين غيطان الفلاحين
لاجل ما الفلاح يلاقي
زرع أخضر م الحنين
لاجل ما تفرح بلادي
لاجل ما نعيش مبسوطين
الغيطان الحلوه ديه
والنفوس المتراضيه
والعيون السود تهلل
يوم ما تلقي اللقمه نيه
والقشف مالي ايديهم
والعرق بحر وماليهم
والهمم عاليه وشامخه
يوم ما ربك بيراضيهم
والطيابه والصلابه
أما معدنهم غلابه
يوم ما يلقوا الديب يعوص
يجروا قدام الديابه
والسلام طبع مراعيهم
والخصال الحلوه فيهم
يوم ما تلقي مصيبه حطت
تلقي كل الناس معاهم
والايمان والصبر شيمه
والعادات دايما قديمه
وتلاقيه مسكين ومعدم
بس راجل كله قيمه
والأسف وبا قول خساره
يوم ما بتذله الإماره
لما يلقي واد أفندي
يلعنه ويلعن أبوه !!!
