رباعيات

ارسم هواك مشنقه
واحلم بيوم اللقا
دي الرقبه   بين حبلين
ارحم كتير م الشقا
....
ارسم بإيدك علم
علي نص متر قماش
لو حتي كان بالألم
دا مافيش وطن ببلاش
....
ارسم بحزنك نجوم
بتغني في الحفلات
ترقص عرايا الجسد
والأمه ماسكه صاجات
....
ارسم بدم الشهيد
علي كل حبه رمل
فارس وجاي م الصعيد
همه يلم الشمل
....
ارسم بصوتك زعيم
ويكون له أب شهيد
ح تلاقي تاره ف عينيه
واحنا لناره وقيد
….
ارسم ب حر الكلام
ع السجن ف ابوغريب
مادام خانوك العرب
فاللي حصل مش عيب
....
ارسم ملوك بتعيش
علي نص قرش حشيش
وارسم شعوب بتموت
علشان تلاقي العيش
....
وارسم في مصر عروسه
وتكون جميله الجسد
اعملها ليك   تعويذه
واحرقها خوف م الحسد
….
وارسمنا كالتماثيل
من عهد حتشبسوت
وارسمنا نهر النيل
اللي عشانه نموت
....
وارسمنا شجره توت
وارسمنا شعب نضال
مبدأنا لو ح نموت
مش كل صقر جمال