رؤيه ف حروف البنت الفرعونيه
- م -
مرت
من بين الجلد وبين أورده الجرح
عزفت
ع الوتر النازف حزن
ف قلب الشق
غنت
بعيونها النيلي لقلبي
أحلي قصيده شعر
ف ... رق
مالت بالبشره القمحي
والشعر المضفر بهموم البنت البدائيه
والراسم فيا
كل ملامحي
لم يقدر قلبي إنه يداري
أو ينطق كلمه لأ
ف   …دق
....
- ن -
ناعسه
النيل نساي
لم يذكر مره الولد
الشارب منه الصبر
والرافض
فيكي الرايه المرفوعه
علي أخر دور
كما لو كانت نصر
والمتوضي
بجوع اخواته
ومصلي
فوق كوبري الجامعه
الفجر
لاجل مايلحق
يحجز ليكي
مكان
في الدرس
كان يرسم قلب
علي الكراس
ويدخل من بين القلب
السهم
وينز   حروف
ال ( E ) وال (   M )
ويخبي مشاعره
لما اصحابه عليه
تىىىتلم
بس عيونه
كانت كاشفه
انه في حبك
لسه بيحبي
لما اصحابه جابولك كارت
في عيد الأم
وهوه جايب لك
من إحساسه
نص رغيف ..
وقصيده هم
ناعسه
عمر الإسم ماكان مشكلتي
أنا شايف فيكي معاني
أهم
مدي إيديكي يكونوا
ضفافي
وكوني لقلبي
الحضن الدافي
لاجل ماينسي الولد
العاشق فيكي
عبير الطمي
إن النيل نساي
.........
- ا -
ابريل
كان شهر الكدب
ومارس
أجمل شهر يكون للحب
دلوقتي الحال اتغير
ابريل
بيجمع بين قلبين
وال ( حمل ) التايه
بين ابراج الحظ
ودايخ علي محبوبه
لقاه
جواه
ياااااااااااااااااه
كان الفرق مابيني وبينك
ست ايام
والمولي زمان
خلق الدنيا ف ست ايام
يعني الفرق مابيني وبينك
كان دنيا
دلوقتي الحال اتغير
والفرق مابينا
اصبح ثانيه
بتمر
من بين الجلد
وبين أورده الجرح
تعزف
ع الوتر النازف حزن
ف قلب الشق
وتنكس فيكي
الرايه المرفوعه
علي اخر دور
فوق كوبري الجامعه
من غير حق
وتطير
فتدمر برجين العقل
المستهبل
كل كراسي
الوطن القاسي
علي ولاده
من أول لحظه طلق
تتغير
كل معالم نهر النيل
تتوحد فينا مشاعر
كانت تايهه
مابين الأهه
وبين ال لأ
.......
- س -
ساعه الجامعه
لما يتجمع تحت جناحها الطلبه
تحن
فتلم تروسها
وتضم العاشق
بالمعشوق
وبكل الشوق .. بترن
( تن ..
تن ..
تن )
تن
تنساه اللحظه
وتنهيده عشق
تمد إيديها
وتخرج
من حنجره الولد
إل لابس كل هموم البيت/
واخواته الرضع
لما يقرصهم برد الجوع
فتئن
تن
تنده له البنت
الواخد منها
( توت عنخ أمون )
كل ملامحه
والواخد من بشرتها
الصبح الوردي
لاجل مايصبح وردي
.. الإذن
تنده له البنت
فيرسم في الخطوه مابينه وبينها
الحلم
تسأله ع الساعه
يبص لساعه الجامعه
تلمح في عيونه الدمعه
فتقول ( أنا أسفه ) ...
وتستأذن
تن
تنشق الأرض
وتبلع منه وبيه الحسره
وكان يتمني
لوتبلع
كل معاني الخوف والفقر
لكن
مسكين الولد
الفاكر إن
الحب يضيع بالخوف والفقر
وبينسي إن
الحب لا يعرف خوف
ولا فقر
ولا حتي بيعرف
سن
تن   ...
    تن ...
    تن
............

- أ -
أيوب
مغلوب علي أمره
كان فاكر إن
ألوان الطيف
بتكون صوره العشق
ف قلب الولد الراسم
كل مشاكله
ف شارع منشيه التحرير
جوه اللوحه
أيوب مغلوب
لم ينزل مره ميدان رمسيس
لاجل يشوف
في عيون الناس التايهه
احاسيس
مجروحه
لم يعرف إن العتبه الخضرا
لون دستورها اتغير
وان الوان الطيف
بتشكل لون الحزن
في ورق التوت
ع البنت
اللي ماعادت ترجع
بنت بنوت
أيوب مكسور
متأكد إن الدور
ح يمر علينا
من سابع أرض
لأخر دور
........
- ل -
لو تفهم مره
البنت السمرا
إن الشاعر
لاجل قصيده
مش ممكن يدخل
أي مغامره
لو تعرف مره
بهيه
إن الفرض السادس
.. هيه
وان الولد الجاي
بمشاعر متوضيه
وشايل هم حارتنا
معاه
خارجه تشق
سكون الليل
من قلبه
.. الأه
وان البذره
اللي بتنبت شوق
جواه
لوياه
لو.... يااااااه
.......





- م -
مصلوب ع البر
والجرح بينزف
مر
ولا كان بيبوح
لطيور النورس
لما تعدي عليه
بالسر
فتواسي ف جرحه الصبر
وتطير
تنقل إحساسه
لكل طيور البحر
كان يضرب
بعصايه جرحه البحر
فينشق
وتخرج منه عروسه
أن كلم ربك ياموسي
لم تخرج من قلبه
الكلمه المحبوسه
إلا لربه
وعروسه البحر
الساكنه عيون الولد
التايه حلمه
في ميدان رمسيس
كان عارف موج البحر
إنها
بت
حب
به
.....


- أ -
إعلام مجنون
وقلوب شفافه
وفرع لمون
كان ورد النيل
بيميل
ويوشوش خد البنت
الساكنه ف مبني التليفزيون
إن الولد الرافض
أن يذكر اسمه
في
( ما يطلبه المستمعون )
مستني ف مره
تقول له
... كن
فيكون
........