اتكلمي

العيد شقا
فك الجناح م الشرنقه
فراشاته تغزل
في اللقا
أفرول
داير يدور علي كل دار
ويقدم الحزن ف طبق
يا بلبله   ومتغربه
كان نفسي أكون
ليكي الفنن
بس انت عارفه حجتي
أزمه وطن
مليان جواز السفر
ولا عادش فاضل مكان
ينفع لتأشيره
اسيوط   ... سوهاج
لاقصر ... قنا
اسوان
طنطا البحيره
اسكندريه
العريش
القاهره
سجن القناطر
أو طره
مش باقي فيهم مكان
ينفع لتأشيره
ولا بسمه يوم العيد
ولا حتي تكشيره
لمي ملامحك من شوارع
سحنتي
لملمي فيا الشراع
حلمي اللي ضاع
أو جاع
وبكف شقيان
طبطبي
علي ضهر عيل
مرتبك
خجلان يقول لك
غردي واتكلمي
أو خففي عنه الشقا
ادي له مره عيديته
و حني بأه
جاي لك أنا
من بين ضلوع أغنيتين
متلحنين علي غربتي
أنا لسه فارس كلمتي
وانا لسه راسم
فوق كفوف الشمس
أحلامي ومدينتي
ما بينهم انتي
اتغربت فيك الفصول
كان الخريف
واقف علي حد الرصيف
لامم حواليه
اللي فضلوا من البلد
أفرول وسونكي
مستنيين قطر الشتا
الساعه سته الا عشره
مستنيين
ألم المخاض
قلبي اللي فاض
فضفاض وفضي   فضته
الساعه سبعه ونص
والقطر لسه ماجاش
والصيف نزيف
دم البكاره المستباح
عرق الرغيف
والجوع محاصر في البلد
أفرول وسونكي
متلقحين
جنب الرصيف
لما يجوعوا
يرسموا فوق بطنهم
صوره رغيف
وانا لسه راسم
فوق كفوف الشمس
احلامي
ومدينتي
جواهم انت بترسمي
لينا الطريق
وتوزعي
ف عيديتك
وتمرجحينا
في سين وجيم
وف كل شيطان رجيم
وانا لسه حافظ
قاعده التنشين
ومرور شعاع البصر
ع السجن في البساتين
وايديا بتداعب في قنطره التتك
ومثبت الدبشك
في أحضان الكتاف
ماعرفش أخاف
يوم محنتك
اتكلمي
شقي جدار العولمه والجات
نيل السكات
مابقاش يبل الريق
لما يطول   بينا الطريق
واحنا معاك بنعبره
والعيد ماعدش بيطرح الكعك
في صاجات
فوق رووس ولادك
وعيديته
مابتشتريش الفرح
في عينيهم
وانت حروفك بكر
ما مسهاش الخليل
ضميها
لحروفي اللي عاشرت
كل احزان الوطن
فاتيتمت مواويل
واتكلمي