بحبك في الدقيقه يومين وسكنتك مابين الأهه والشريان ملامح جرح في عمري وصوت الحرف في وريدي فيا لغتي اللي عصياني بلاش يخضر فيك اليأس ويطرح خوف علي لساني فروعه محاصره تنهيدي تضفر موتي في ملامحي ولسه بشرتك قمحي تخليني أسوسن شوقي في كلمه واتهجاها ف عيونك ولو تخونيني ما أخونك وأحفر غربتي بشوقي وأكفن فيها أشعاري فيبدأ شوقي يصاحبني ويمشي معايا مشواري ..... وسكنتك عبير الأرض ف عروقي وانا شوقي سوي عيونك مالوش أوطان تشكل فيه هويتها ويفتح مندله فيها يلاقيها ملامح حزن بتعدي وتتمايل علي حروفه وترسم صوره مكسوره ل ( ناصر ) كان ف منديلها تشاور له يغني لها فيتوضي بأناملها يصلي الفجر ف عيونها بحريه يسبح فيها تسبيلها ويقرا سوره ( التوبه ) ف تحدف له مناديلها يبوسها يلفها ف جيبه يفاجأ إنه م الفقرا مالوهش جيوب فيربطها علي جبينه عشان ما تسطر المكتوب ..... وسكنتك مابين الجبهه والمنديل غنا ومواويل عيونك والقمر قناديل وانا لسه طريقي طويل وجاي شايفك طريقي حدوده في شفايفك وعارف ان انا عارفك وانا صغير وانا صغير في حجر الأم شميتك ولما جت ترضعني لقيتك شيئ بيمنعني ف شراييني وإيه يعني ما إنت رضعتي وديني .. وانا راضي مابين الرقوه والتانيه صدي صوتك يحاوطني رقيتك من ملوك نايمه وانا باصرخ علي الجبهه رقيتك من شباب هايمه تعشم بنت وتسيبها رقيتك من عيون شافت ولا صلت رقيتك من ايدين نهبت ولا كلت ولا خلت وسكنتك مابين الحزن في ( بؤونه ) و (توت ) الفرح عشان تحضني وتبلسم ف عيني الجرح وترسمني ف دواوينك بهيه وطينها من طينك نجاه من خلق حاسديني وحاس دينك فصادر فيا ماتقدر وصورني .. ح تلقاني قصيده عشق ممدوده لسابع أرض وكلمه حق مرفوعه بتحمي العرض شيوخ في البرد مضمومه تصلي الفرض وناس بهمومها مجروره ورافضه الرفض .... - وسكىöني مابين الضمه والفتحه عروسه وكلمتك طرحه علي راسها - وسكنتك مابين الكسره والشده زمن عدي وسلسل فيها انفاسها - وسكىöني ما بين السكنه والتنوين أغاني حنين ترد الروح لحراسها - و سكنتك مابين قوسين وضمنتك زناد وإيدين بتتسابق وتحرسها - رقيتك لاجل ما تكبر وتصبح دنيتي وناسها ..... انا راجع ف صدري أيه الكرسي وحافظ سوره ( الشعراء ) وكلمه حب ولما الفجر يتمايل علي كفوفي يزول خوفي واضمك وسط احضاني واغطيك بأجفاني ومين بعدي ح يهواك وانا بعدي مافيش تاني ¿ يقولك إني سكنتك .... بحبك في الدقيقه يومين واحبك كل يوم سنتين واحبك في السنه دهرين وانا ضهري انحني حرفه علي شباك وبوابه وشهقه شمس أوابه بتخنقها مباحث إيدك العشره وفي النشره بيحكوا لنا عن الإرهاب - مافيش فايده - .... وسكنتك مابين الرمش والنني وانا إكمني بادوب فيك بكل عروقي لايمني وانا مسامحك مادام القمح مش قمحك مادام الفاكهه في الصوبه بتضحك لي وتتغازل ح اعيد تاني قرايه سوره ( التوبه ) ولا يمكن راح اتنازل - صوت – أخاف لو إني سكنتك في لحظه تخونني سكينتك ...
