غمضت عيني

غمضت عيني عليك امبارح
لقيت نفسي جناح طير
وسط سما ألوان
وسحابه ضوء
بفرنشه حرير
وهوا غرقان أنغام
وبقعه حب كبيره
وفرحه ف رعشه غريبه
تزغلل دمع العين
وتنام
ف تنهيده وتسبيحه
وركعه شكر
ورضا وسلام
لأنه خلاص أنا مسمحاك
ومهما داريت أنا فاهماك
ورغم البعد أنا شارياك
لكن خلاص مانيش عايزاك
بواقي الشوق
لحضن دفاك
ف مجري الدم حتت ألوان
معجون إنسان
بيتشكل ويتلون
ويتلوي بكل حنان
أكيد فيه قلب
جميل بيحب
ح يجي ف يوم
يناديني
ويسقيني
تنور دنيتي تاني
وأغني كمان