سرقت دقيقه

سرقت دقيقه من سله الساعات
وجريت استخبي
وف حضن شجره ربيعها فات
سرحت حبه حبه
غرق السكون حواليا
نعس النهار
ف عينيا
وهمست اسمك
لمس السكات خصله هوا
ولقيتني أسرك
حضن الهوا صوت شأشأه
ورسمت سيرتك فوق الخضار غرقان ندي
وف وسط موجه دندنه
وف كل أسمر عوده بيفكرني بيك
طينه وترابه
وأرضه بياخدني ليك
وبعد وصله حنين طويله
همست ف ودني الدقيقه
"لازم وحالا نرجع لسله الساعات
وننسي حضن الشجره
وربيعها اللي فات"
سبت اسمك ورسمك
وسيرتك
وجريت ألاحق روحي
وحيرتي وضعف خوفي
لقيت دقيقتي ف قلبي
وف سله ساعات
وحاولت أستخبي
من كل الشجر
واللي فات..
حبه حبه