قرار إزاله
 
الجسم هزيل ...
وسنين العمر المحشوره
في حواري الروح
مع كل تراب أرض الأوضه
عامله التطبيع ..
أمبارح بس ...
الركن الضلمه اللي سايعني
مبقاش بيسيع ..
وباحس الكون بيضيق بيُا
القلب ال تعود يضحك
دلوقتي حزين ...
ونا شايف جسمي المتكوم
علي شكل جنين
والعين بتلف مع الساعه
وتزك مع العقرب لحمر
والضغط الواطي اللي تاعبني
وبقاله سنين
مع كل دبيب خطوه تعدي
يوصل لمتين ... !!
القلم المتعود يمضي
قرارات وخلاص
منزوع من بين قلبه الأحساس
وأنا كل ما افكر إيه حيكون
وأزاي راح أعيش من غير جدران
ف الساعه أموت ستين مره
أطلع بره ...!
م أنا ليُا سنين طالع بره
الشق اللي أتعود يوسع
لسه بيوسع ...
لكن أنا راضي بنفس الحال
ومدام السقف بيحميني
من طل الليل ...
ح أفضل راضي ...
الرعب اللي بييجي يزورني
مع كل نهار ...
علي باب الدار ...
واقف بيقول لم عزالك
مش وقت عزال ...
م أنا كل عزالي يدوب هدمه
وملايه وكيس عامله مخده
لكن أنا فين ..¿
وح أروح علي فين ..¿
علي أي رصيف أنا ممكن أنام
وأحلم .. وأعيش
ويقولوا عليُا الناس درويش
لكن مين يضمن يوم ميجيش
القلم المقتول الأحساس
وأنا نايم ساعه قياله
والحاله كما نفس الحاله
بقرار بيقول ....
                    برده أزاله