كانت يمامه صغيره

  

 كل اللي فاضل منُها

حبه حاجات

دبدوب قماش ..

عصفور حجر ..

وبواقي من حلمي اللي فات

وكتاب قديم

فيه الغناوي كلها

وقصيده لسه بخطها

{ كانت يمامه صغيره

فارده الجناح فوق السحاب

كانت  يا دوب مستنظره

حضن الوليف ..

صادها الغراب }

ونا كنت ليها السندباد

جاني المطر قبل المعاد

كسر جوانب مركبي

سلمني للموج الغبي

رغم المعافره والعناد

ما قدرتش أتحمل أنا

وغرقت في الأحزان سنه

يا هل تري ..

شباك حبيبتي الطيبه

لساه موارب ع الأمل

وألا إنقفل ..¿

يا هل تري ..

عصافير جناين حبنا

لساها عاشقه الصوصوه ..¿

يا هل تري ..

موجنا العجوز

لساه بيعزف غنوتي

علي صخره الحلم الجميل

وألا أنكسر ..¿

يا هل تري ..

كل اللي فاكره محتمل

ممكن يكون ..¿

وألا الرجوع ..

لطريق حبيبتي الطيبه

شرك وجنون ..¿

قلبي يا فاتح قبلتك للذكريات

لساك بتتحدي الزمن

بالأغنيات ..¿

لساك بتعزف ع النهار

بالدمع لحن الأمنيات ..¿

شايفك وحيد ..

كل البشر ..

بينك وبينهم ألف سور

واللي فضل .

وياك ف وحده غربتك

حبه حاجات

دبدوب قماش ..

عصفور حجر ..

وبواقي من

          حلمي اللي فات