صخره الحلم الجميل مدد ... مدد يا حلم جوايا أتولد شايلين حروفك نجمتين إحساس برئ .. بس الطريق . يا قلبي ده وخدك لفين ما بين نجومها والرموش شئ ما اعرفهوش بيرجني ويشدني لطريق طويل إحساس جميل بيزغزغ القلب اللي نايم من زمان يرقص حنان ويردد اللحن اللي منسي من سنين مليون مدد يا حلم جوايا أتولد من بذره الحس القديم عمر السنين وف حضن بحرك يا جليم مرسي لكل العاشقين تقعد هناك أجري وأقعد جنبها تضحك أقرب منُها ألمح نجومها منوُره ونا جاي ف إيدي كوز دره حباته لؤلؤ مرصوصين أقطف وأحط ف بقها أشبع أنا ... أحلم بعش يضمنا نلعب مع الموج الشقي يرقص .. يرقُص حلمنا تأكل عقارب وقتنا كل الساعات نسرق من الوقت اللي فات طعم العسل ونقوم نرقُص حلمنا علي لحن أنغام الرجوع تنزل دموع من صخره الحلم الجميل ودموع تسيل علي نن عين موجنا الشقي واليوم يفوت .. مع يوم جديد بيشدنا لنفس المكان نرجع قوام نلمح خطاوي الفرحه للموج الشقي يا موج عجوز .. جواك سنين شايله حكاوي العاشقين سجُل حكاوي قصتي وأبقي أبتدي تحكيها للنجمه اللي واقفه وحدها ساعه ما تلمح خدها من غير ورود ساعه ما تلمح وشها ملفوف بتوب الحزن وخيوط السكوت وأعرف ساعتها إن أنا يا موج بموت
