أنا بغداد
 ولو زرعي طلع مايل
ونبت لي متين حجاج
أنا بغداد ...
ولو مال الزمان بيُا
وجرحي بأيدين مني
وأيد كفار
وطوحني بمثال جنكيز
محال أنهار
أكيد الغمه هتعدي
وشمسي تطل
أكيد في فجر
ح يجي يرجع البسمه
ويرمي فحجري ألف نهار
محال أنهار
ولا فراتي حيتوقف عن الجريان
 ولا أرضي فيوم حتبور
أنا النعمان .. أنا منصور
أنا عشمي ف رب الكون
وقوه كن ... وبيها أكون
واعود تاني كما الماضي
أطُلع من رحم أرضي
ولد فارس ...
يكون عارف حدود الله
يناجي سماه
يحج فعام .. ويغزو ف عام
يقول لسحابه لو مرت
علي راحتك ..
منين المولي شاء إرمي
وخيرك برده ح يعودلي
وأقف تاني بسلطاني
علي يميني ديوان كسري
علي شمالي قصور قيصر
فروض الطاعه قدامي
ألم الأمه بجناحي
أكون كالغول علي العادي
وأكون أرغول علي ولادي
علي أرضي الأمان والزاد
أنا بغداد
-----------------------------------------------------------