إرجع بأه
وفك حبل المشنقه
وامسح همومنا باللقا
ياجدرنا تحت التراب
يا حلمنا فوق السحاب
يا عمرنا طال العذاب
في الإنتظار
رجعوا التتار
لكننا أشواك بتتحدي العطش
وجنود بتتحدي الفرار
نسقط ساعات
لكننا نفضل كبار
نفتح عيون للانبهار
متشوقه
فارجع بأه
وفك حبل المشنقه
وارفع راياتك يا أبي
قريش بتسأل عن نبي
يهديها من بعد العمي
خالد قتل مسيلمه
لكن جنوده الكدابين
عينهم في طابا
يتحدوا فرسان الخطابه
ويلجموهم بالسكوت
في عصر بيروت الحزين
خالد قتل مسيلمه
لكن جنوده الكدابين
بيفتتوا دلتاك بصبر
وبيحفرولي في سينا قبر
وبيركبوا نيلي العنيد
وبيخنقوني في الصعيد
بكلام نكت وبتريقه
فارجع بأه
دا الهزل زاد
والباشا إيده علي الزناد
وصدقي بيصلي لفؤاد
وبيحلفوا نرجع عبيد
نتباع في أسواق الكساد
الهزل زاد
والباشا إيده علي الزناد
والسد جوه الفوهه
لو ينسفه تغرق بلادك كلها
وتعود سنين الأوبئه
تسكن ضلوعنا الضيقه
فأرجع بأه
الشمس سكنت كل غرب
حلفت ما ترجع للشروق
من أي شرق
إن لم تكن في الأنتظار
إنت وسيفك -والتتار تحت القدم-
فأقضي بصوتك علي العدم
إعدل موازين الزمان
رتب نجومنا في الفضا
وأكسي وجوهنا بالرضا
بعد الشقي
دي الأمه لسه محتاجاك
والأرض لسه مهيأه
فأرجع بأه