يىامنىىىه !!

والله وشبت ياعبد الرحمن
عجزت ياواد ¿
مسرع ¿
ميتي وكيف ¿
عاد اللي يعجز
في بلاده
غير اللي يعجز ضيف
هلكوك النسوان ¿
شفتك مره في التلفزيون
ومره وروني صورتك
في الجورنان
قلت كبر عبد الرحمن !!
امال انا علي كده مت
بقي لي ميت حول !!
والله خايفه ياولدي القعده تطول
مات الشيخ محمود
وماتت فاطنه اب قنديل
واتباع كرم اب غبان
وانا لسه حيه
وباين حاحيا كمان وكمان
عشت كتير
عشت لحد ماشفتك عجزت
ياعبد الرحمن
وقالولي قال خلفت
وانت عجوز خلفت ياخوي
وبنات ¿
امال كنت بتعمل ايه
طيله العمر الفات ¿
دلوقت مافقت ¿
وجايبهم دلوك تعمل بيهم ايه ¿
علي كل
اهي ريحه من ريحتك
ع الارض
يونسوا بعض
ماشي ياعبد الرحمن
اهو عشنا وطلنا منك
بصه وشمه
دلوك بس مافكرت في يامنه
وقلت ياعمه
حبيبي انت ياعبد الرحمن
والله حبيبي وتتحب
علي قد ماسارقاك الغربه
لكن ليك قلب
مش زي اولاد الكلب
اللي نسيونا زمان
حلوه مرتك وعيولاتك
والا شبهنا
سميتهم ايه
قالوا ايه ونور
ماعارفش تجبلك حته واد
والا اقولك
يعني اللي جبناهم
نفعونا في الدنيا بايه
غيرشي الانسان مغرور
ولسه يامنه
حاتعيش وحاتلبس
لما جايبلي قطيفه وكستور
كنت اديتهمني فلوس
اشتري للركبه دهان
ابا...ي
يامجلع قوي ياعبد الرحمن
طب دانا ليا ست سنين
مزروعه في ضهر الباب
لم طلوا عليا احبا
ولا الاغراب
خليهم ينفعوا
اعملهم اكفان !!
كرمش وشي
فاكر يامنه
وفاكر الوش
اوعه تصدقها الدنيا
غش في غش
اذا جاك الموت ياوليدي
موت علي طول
اللي اتخطفوا
فضلوا احباب
صاحيين في القلب
كان ماحدش غاب
واللي ماتوا
حته حته
ونشفوا حيين
حتي سلامو عليكو
مش بتعدي
من بره الاعتاب
اول مايجيك الموت
افتح
اول ماينادي عليك اجلح
انت الكسبان
اوعي تحسبه حساب
ولا واد ولا بت
ده زمن يوم مايصدق
كداب
سيبهاله بالحال والمال
وانفد
اوعي تبص وراك
الورث تراب
وحيطان الايام طين
وعيالك بيك
مش بيك عايشين
يوه .... يارمان
مشوار طولان
واللي يطوله عن يومه
ياحبيبي حمار
الدوا عاوزاه
لوجيعه الركبه
مش لطواله العمر
اوعه تصدق الوانه
صفر وحمر
مش كنت جميله ياواد
مش كنت وكنت
وجدعه تخاف مني الرجال
لكن فين شفتوني
كنتوا عيال
بناتي ( رضيه ) "ونجيه "
وماتوا وراحوا
وانا اللي قعدت
طيب يازمان
اوعه تعيش يوم واحد
بعد عيالك
اوعي ياعبد الرحمن
في الدنيا
وجع وهموم
اشكال والوان
الناس مابتعرفهاش
اوعرهم
لو حاتعيش بعد عيالك
ماتموت
ساعتها بس
حاتعرف
ايه هوه الموت
اول مايجيلك نط
لسه بتحكيلهم بحري
حكايه فاطنه
وحراجي القط
اباي ماكنت شقي وعفريت
من دون
كل الولدات
كنت مخاوي براوي
وكنت مخبي في عنيك السحراوي
تملي حاجات
زي الحدايه
تخوي ع الحاجه وتطير
من صغرك
بضوافرواعره
ومناقير
بس ماكنتش كداب
واديني استنيت في الدنيا
لما شعرك شاب
قدم البيت
اتهدت قبله بيوت
واصيل هوه
مستنيني لما انوت
حتيجي العيد الجاي
وحتشرب
مع يامنه الشاي
***
حاجيياعمه وجيت
لالقيت يامنه
ولا البيت
***