اسمع منه أقول الله ... امشي و لا امشي وراه
حزب اللأه ... و حزب الآه
و التعليق :
عيني على الشعب ماهوش صديق ... يسأل عنه و هو غريق
جوه بلاده كأنه غريب
أهرب منه و أقول الله ... أمشي معاه و لا امشي وراه
حزب اللأه ... و حزب الآه
و أدي كمان مانشيت أنيق ... حزب الآه حيشق طريق
يعبر بينا لبر الخير ... يكفي ولادنا و يكفي الغير
و التعليق :
عيني على الشعب بقالوا سنين ...يضحك .. .. يبكي مع السامعين
بكره حيجي ... ليه ما يجيش
بكره جاتوه ... و اليوم قراقيش
أهرب منه و أقول الله ... أمشي معاه و لا أمشي وراه
حزب اللأه ... و حزب الآه
و آدي كمان مانشيت يا بيه ... حزب اللأه بيرفض ليه
كل مجاري الدنيا بتصرف ... بر وبحر و جوه كمان
و احنا يا عيني علينا بنصرف ...كام مليون كده على الخلان
و التعليق :
عيني على الشعب يبات غرقان..آشي مجاري و آشي ديون
أمشي معاه و لا أمشي وراه ...حزب اللأه .. .. و حزب الآه
و آدى كمان صفحة مزاجات ...أهل الفن صحيح مقامات
قصة فيلم مالوش عنوان ... و الرقاصه في بدلة توت
أرقص .. طبل .. ليه قلقان... خلي الليل و الصبح يفوت
و التعليق :
ياما أغاني بدون ألحان ... خلت ذوق الشعب يموت
و القرداتي صحيح فنان ... خايف ترجع كلمة لوط
أهرب منه و أقول الله ...أمشي معاه و لا امشي وراه
و آدي كمان الست بهانه ... قاعده بتندغ ليه في لبانه
ظبطوا موظف بالبقشيش ...يقبض وحده و لا يديش
و التعليق :
ليه المال العام منهوب ...ليه الحق يبات مغلوب
ليه الوضع يا بيه مقلوب
أهرب منه و أقول الله ...أمشي معاه و لا امشي وراه
حزب اللأه ... و حزب الآه