بيان هام
هنا شقلبان
محطه اذاعه حلاوه زمان
من القاهره ومن كردفان
وسائر بلاد العرب واليابان
ومن فنزويلا أيضا ايران
ومن اي دار
أو بلد مستباحه
بفعل السياحه مع الأمريكان
هنا شقلبان
محطه اذاعه حلاوه زمان
نقدم اليكم بكل اللغات
مراسح وسيما وجميع الفنون
صحافه ومنابر وتلفزويونات
وخطبا ف جوامع وجبنه وزيتون
ونقزح ونركب جميع الموجات
ونبحث ونفهم في كل الشئون
ودايما نلعلع في كل الحالات
ولا حد سامع ولا يحزنون
وتسمع ما تسمع دا ما يهمناش
لأن احنا اصلا بناكل بلاش
فخليك في نفسك وما تخليناش
نسلط عليك القلم واللسان
هنا شقلبان
محطه اذاعه حلاوه زمان
يسر الذاعه ولا يسركوش
بهذي المناسبه ولا بندعيكوش
نقدم اليكم شحاته المعسل
وبدون الرتوش
شبندر سماسره بلاد العمار
معمر جراسن للعب القمار
وخارب مزارع و تاجر خضار
وعقبال أملتك أمير الجيوش
ما تقدرش تنكر
تقول ما اعرفوش
ما تقدرش ايضا تفول ما أسمعوش
شحاته المعسل حبيب القلوب
يزيل البقع ولاهموم والكروب
يأنفس يأفين يبلبع حبوب
ويفضل يهلفط ولا تفهموش
وتفهم ما تفهم دا ما يهمناش
لأن انت فاهم وعامل طناش
ح تنكر وتحلف ح اقول لك بلاش
ح تتعب دماغنا وتتعب كمان
هنا شقلبان
محطه اذاعه حلاوه زمان
لأن المخبي ظهر واستبان
وكل المسائل بدت للعيان
وطلعت حكاوي ونزلت كمان
عن التهريبه وعن كيت وكان
وعن محسوبيه وعن ألعبان ( بضم الالف)
ظهر في المدينه كأن الطوفان
وغرق مراكب وسوح غيطان
وبعض المراكب ح تغرق كمان
وأزمه مساكن وأزمه أمان
وعالم بياكل في عالم جعان
وريحه مؤمره في جو المكان
مخطط خيانه مع الأمريكان
لدبح العشيره وحرق المكان
وفيه ناس بترغي ولازم بيان
كما ابلغونا جميع الودان
لهذا وذاكا وتلكم كمان
نقدم اليكم عروسه وحصان
شحاته المعسل وهذا البيان
هنا شقلبان
محطه اذاعه حلاوه زمان
بسم الله
سلام عليكم وسلمون وموز
وأما المسائل فهنجف ولوز
فيا اخوتي ويا أخوات
اليكم بياني كما هو أت
جميع المسائل تمام التمام
وكل الكلام دا مجرد كلام
فصبرا جميلا ولا تقلقوش
وشغل الضغاين أنا ما أقبلوش
ما فيش أي حاجه
علي الطلاق والعتاق بالتلاته
ما فيه اي حاجه
وقدر كمان ان فيه أي حاجه
ما لوش أي لازمه الكلام واللجاجه
وعيب ان عيل يسوق السماجه
ويعمل لي باللو ويعمل ديباجه
أنا بطبعي ضد السماسره الكبار
بحكم المنافسه وحكم الجوار
لكن مش في طبعي
اني أعمل فضيحه
لواحد زميلي هبش كام صفيحه
ما كل الزمايل بتهبش صفايح
وكل اللي جاي مش زي اللي رايح
فيا ايها الشعب صهين تفلعص
مساء التنفس مساء الروايح
أخويا الامير بزرميط الايراني
بعت لي السنه دي
عزمني ودعاني وأنا قبلت طبعا
ورحنا العزومه وكانت وليمه
ما تحصلش تاني دا أيه المحمر
وأيه المكمر وايه المشمر
وايه الصواني
وانا دماغي تعبت ولفت صراحه
من الفخفخه والهنا الاصفهاني
هناك يعني مثلا اذا شربت طافيه
تمز بكوارع وبسطرمه ضاني
ما شفتش هناك
ناس بتحقد عليهم
ولا ناس بتشتم فلان الفلاني
لأنه اشتري عزبتين من شطارته
وحكمه ادارته وطلع مباني
وبعد الوليمه استلمنا الهدايا
مفضض ومدهب وقز وقيشاني
وطبعا أخويا الأمير قال لي حاجه
ح اقولهالكو طبعا اذا الوقت ناسب
ح يطلع لي عيل بدون اي حاجه
ويعمل لي فلحس ويقعد يحاسب
دا حقد اشتراكي أنا ما أقبلوش
ولو هو ابني أنا ما اعتقوش
كلام عن سماسره كلام عن دعاره
حاجات مش صحيحه جمل مستعاره
وعايزين يخلوا البلد اردغانه
وعايزني اسيب البلد من زمان
وأنا مش ح اسلم واسيب الأمان
ولا بالبوليس والنيابه كمان
فيا ايها الشعب كمل جميلك
وصبرا واذلم حتيجي المصاري
وتاكل وتشرب تبع ما يأتيلك
وتغرق في بحر العبيد والجواري
وترسم حياتك حسب ما يرائيلك
ونملا الحواري فساقي وقصاري
تسبح بحمدك وتشكر جميلك
وفضل الزباله وطفح المجاري
ختاما سلاما وأخر كلاما
ضرورا
يسود الهدوء والوئام فماذا والا
ح طربقها واللا اهرب فلوسي
واسافر قواما سلام عليكم
وسلمون وموز بصفتي رئيسا
وابا وجوز
القاهره /1967