روز نبىىىىىىىىىىىىىىىىىىىىىىرج
 
في الروايه الأمريكانيه .... العصابه
تقتل اللي تخاف ليفتن للنيابه
الزعيم يأمر بسحبه جوه غابه
و الرصاص يعمل عزومه للديابه
أصله كان يعرف حاجات فوق اللزوم
و القتيل عمره ما ينطق أْو يقوم .. !
و العصابه المريكيه العالميه ...
مش بتسرق ميُه و الا خمسميه
لأْ .. دي بتقشُط شعوب م الانسانيه
و السلاح ذره و قنابل ميكروبيه
و اللي ييضح جرايمها يتقتل
زي روزنبرج و مراته إتل
الوليفه يقتلوها و الوليف
لجل ما يموت السلام فوق الرصيف
السلام حلم الشعوب كابوس مخيف
للي بيبيعوا السلاح قبل الرغيف
و القضاه في الخدمه يا ايزنهور
كلهم في إيدين فخامتكم كور
يحكموا حسب القانون و انت القانون
اللي حاكم ع البلاد تصبح سجون
الدولار يملا الحافظ و البون
و الدموع تملا الحناجر و العيون
و السلوك يتوهجوا مره في مره
لجل ما تموت نفس كانت عايشه حره
الشعوب مشيت حزينه في الشوارع
و المكن نام جنب عمال المصانع
لما وقفوا للحداد بعد الفظايع
اللي روزنبرج شافها و هو راجع
للعدم ... في نهايه الفصل النهائي
م الروايه ... علي كرسي كهربائي
كل قوه في الطبيعه يقتلو بها
كهربا و ذره و غيرها يبتلو بها
الشعوب في كل يوم و يمثُْلو بها
و الشعوب قوتها مخزونه ف قلوبها
للسنابل و المناحل و الزهور
لما يفنْي الظلم و المكن يدور
المكن حايدور و حايدور بانتظام
لجل ما الانسان يعيش حر بسلام
و السما حايسدها جيش الحمام
فوق أْراضي مصر و جبال فيتنام
و ف أْمريكا نفسها و الناس تقول
إن روزنبرج عايش علي طول
مايو أو يونيو 1953