يا هرم سمعني صوتىىىىىىىىىىىك
 
يا هرم لو كنت تحكي
قصه المجد اللي كان
ورده بتنور زمان
و الا أبو الهول لو يبطل
صمته مرهو يحاورني
علي اللي شافه قبل مني
و الشكوك اللي تساورني
علي اللي قالوا .. .. ..
و اللي عدوا .. .. ..
و اللي راحوا يوم و غابوا
علي التاريخ اللي انت عارفه
و التاريخ اللي انت منه
علي اللي غير لون حياتك
و اللي باع النيل عشانك
علي الحقيقه لما غابت
عن عيونا
عن قلوبنا
يا هرم اصحي و الا
بكره ينساك العباد
أه يا ليل
أه يا ليل مليت سواده
أه يا قلب
أه يا قلب يطول حداده
أه يا شعب
أه يا شعب يفوت بلاده
في النهار بتموت ولاده
اللي مات علشان يعيش
و اللي مات علشان غشيم
ماشي يفضح في الليم
و اللي مات من غير ميعاده
و اللي مات في يوم ميلاده
يا هرم اصحي و الا
بكره ينساك العباد
يا هرم قول الحقيقه
خللي أسرارك تبان
انت خايف من عيونهم
و الا خايف من الزمان
انت حارس للحقيقه
و الا مدفن للأمان
انت مصري بالجواز
اصحي و اتكلم عشانا
قبل ما يفوت الأوان
يا هرم ليه تبقي صوره
يلعبوا بيها الولاد
يا هرم خليت طريقك
لونه أحمر من الفساد
يا هرم اصحي و الا
بكره ينساك العباد
يا هرم سمعني صوتك
خوفو نايم تحت خوفك
يا هرم اصحي و الا
كلنا نتمني موتك
قوللي مين أمك و أبوك
و الا مين أختك و أخوك
قوللي مين اللي باعوك
و الا مين اللي اشتروك
قوللي مين مخلص في حبك
و الا مين تاجر بحبك
قوللي أصلك
قوللي فصلك
قوللي مين مدفون معاك
و احتويته
و احتواك
ياما فيك أسرار كتيره
دوختني
توهتني
قوللي كلمه وانت صادق
كلمه واحده عشان أفارق
هي كلمه
الحقيقه