عن موضوع الفول واللحمه صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقه وقوه عجيبه تسمن جدا تبقي مهول
ثم اضاف الدكتور محسن ان اللحمه دي سم أكيد
بتزود أوجاع المعده وتعود علي طوله الايد
وتنيم بني ادم وتفرقع منه المواعيد
واللي بياكلوا اللحمه عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأي جنابك وجنابهم فيه واحد مجنون بيقول
احنا سيبونا نموت باللحمه وانتو تعيشوا وتاكلوا الفول
مارأيك ياكابتن محسن مش بالذمه كلام معقول
