بيان هام


( تقليدا لخطب انور السادات كتب احمد فؤاد نجم هذه القصيده مقلدا صورته وحركاته وتسببت في رفع قضيه ضده بتهمه سب وقذف موظف عام صفته رئيس الجمهوريه واطلاق صفه عليه وحين ترافع السيد احمد نبيل الهلالي محامي الحزب الشيوعي المصري عن نجم علل القاضي التهمه بان الشاعر استخدم " لازمه " السادات في خطاباته للتشهير به فرد المحامي النابه " طب بذمتك يا سياده القاضي الريس بتاعنا ليه لازمه ¿ " ولقبه الشاعر بشحاته المعسل والمعسل لا تعني ذو الطعم السكري بقدر ما تعني المعسل تبع الشيشه وخلافه حيث كان من المعروف عن البيه حبه الشديد للمخدرات
هنجف = كلمه اشتقاقيه من كلمتي عنب و نجف والاثنتان تعبران عن تمام الشيء علي أكمل وجه -
مراسح = لفظه مقلوبه مستخدمه للتندر علي المسارح -
- شبندر = اشتقاق اخر من شهبندر و هو رئيس الطائفه من السوق في مصر المملوكيه
- جراسن = جمع اشتقاقي لجرسون بالفرنسيه وهو النادل او القائم باعمال الخدمه في صالونات القمار - يأنفس = تعني ولو مؤاخذه يضرب انفاس الحشيش وهي اشتقاقيه ايضا - يبلبع تعني يتعاطي ادويه مخدره علي سبيل الكيف وكذلك يأفين بمعني لمؤاخذه يضرب افيون - يهلفط = الهلفطه كلمه عربيه فصيحه تعني الكلام الغير معروف ومستخدمه عاميا بكثره
- صهين تفلعص = صهين بعني الطناش الفلعصه هي الحركه التي يقوم بها القرموط للإنزلاق من يد الصياد والدخول في طين الترع والمصارف مره أخري بفضل انسيابيته ولزوجه الطين )

هنا شقلبان
محطه إذاعه حلاوه زمان
من القاهره
ومن كردفان
وسائر بلاد العرب
واليابان
ومن فنزويلا
وايضا ايران
ومن أي دار
او بلد مستباحه
بفعل السياحه
مع الامريكان

هنا شقلبان
محطه اذاعه حلاوه زمان
نقدم اليكم بكل اللغات
مراسح وسيما وجميع الفنون
صحافه ومنابر
وتليفويونات
وخطبا ف جوامع
وجبنه وزيتون

ونقزح ونركب جميع الموجات
ونبحث ونفهم
في كل الشئون
وديما نلعلع في كل الحالات
ولا حد سامع
ولا يحزنون

وتمسع ما تسمع
دا ما يهمناش
لان احنا اصلا
بناكل بلاش
فخليك في نفسك
وما نخليناش
نسلط عليك القلم
واللسان

هنا شقلبان
محطه اذاعه حلاوه زمان
يسر الاذاعه
وما يسركوش
بهذي المناسبه
وما بندعيكوش
نقدم اليكم
ولا تقرفوش
شحاته المعسل
بدون الرتوش

شبندر سماسره بلاد العمار
معمر جراسن للعب القمار
وخارب مزارع
وتاجر خضار
وعقبال املتك
امير الجيوش
ما تقدرش تنكر
تقول ما اعرفوش
ما تقدرش ايضا
تقول ما اسمعوش
شحاته المعسل
حبيب القلوب
يزيل البقع
والهموم والكرب
يأنفس
يأ فين
يبلغ حبوب
ويفضل يهلفط
ولا تفهموش
وتفهم ما تفهم
دا ما يهمناش
لان انت فاهم
وعامل طناش
ح تنكر وتحلف
ح اقول لك بلاش
ح تتعب دماغنا
وتتعب كمان
هنا شقلبان
محطه اذاعه حلاوه زمان
لان المخبي ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبيه
وعن كيت وكان
وعن محسوبيه
وعن العبان
ظهر في المدينه
كانه الطوفان
وغرُق مراكب
وسوح غيطان
وبعض المراكب
ح تغرق كمان
وازمه مساكن
وازمه امان
وعالم بياكل
في عالم جعان
وريحه مؤامره
في جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما ابلغونا
جميع الودان
لهذا وذاكا ... وتكلم كمان
نقدم اليكم
عروسه وحصان
شحاته المعسل
وهذا البيان

هنا شقلبان
محطه اذاعه حلاوه زمان
بسم الله
سلامñ عليكم
وسلمون وموز
واما المسائل
فهنجف ولوز
فيا اخوتي
ويا اخوات
اليكم بياني
كما هو ات :

جميع المسائل
تمام التمام
وكل الكلام دا
مجرد كلام
فصبرا جميلا
ولا تقلقوش
وشغل الضغاين
انا ما اقبلوش

ما فيش أي حاجه !
علي الطلاق والعتاق بالتلاته
ما فيه أي حاجه !
وقُىُدر كمان ان فيه أي حاجه
ما فيش أي حاجه
ما لوش أي لازمه الكلام
واللجاجه
وعيب ان عيل يسوق السماجه
ويعمل ديباجه

انا بطبعي ضد السماسره الكبار
بحكم المنافسه
وحكم الجوار
لكن مش ف الطبيعي
اني اعمل فضيحه
لو احد زميلي
هبش كام صفيحه

ما كل الزمايل
بتهبش صفايح
وكل اللي جاي
مش زي اللي رايح
فيا ايها الشعب
صهين تفعلص
مساء التنفس
مساء الرويح

اخويا الامير بزرميط الايراني
بعت لي السنه دي
عزمني ودعاني
انا قبلت طبعا
ورحنا العزومه
وكانت وليمه
ما تحصلش تاني
دا ايه المحمر
وايه المكمر
وايه المشمر
وايه الصواني
انا دماغي تعبت
ولفت صراحه
من الفخفخه
والهنا الاصفهاني
هناك يعني مثلا
اذا شربت طافيه ( نوع مهبب من الخمور يدعي منقوع البراطيش ايضا )
تمز بكوارع
وبسطرمه ضاني

ما شفتش هناك
ناس بتحقد عليهم
ولا ناس بتشتم
فلان الفلاني
لانه اشتري عزبيتن
من شطارته
وحكمه ادارته
وطلُع مباني

وبعد الواليمه استلمنا الهدايا
مفضض
ومدهب
وقز وقيشاني
وطبعا اخويا الامير
قال لي حاجه
ح اقوالها لكو طبعا
اذا الوقت ناسب
ح يطلع لي عيل
بدون أي حاجه
ويعمل لي فلحص
ويقعد يحاسب
دا حقد اشتراكي انا ما اقبلوش
ولو هو ابني انا ما اعتقوش
كلام عن سماسره
كلام عن دعاره
حاجات مش صحيحه
جمل مستعاره
وعايزين يخلوا البلد
اردغانه ( اردغانه بمعني ماخور شعبي )
وعايزين اسيب البلد
من زمان

وانا مش ح اسلم
واسيب الامان
ولابالبوليس والنيابه كمان
فيا ايها الشعب
كمل جميلك
وصبرا
واذلم حتيجي المصاري ( اذلم = اذا لم )
وتاكل وتشرب
تبع ما ياتيك
وتغرق في بحر العبيد والجواري
وترسم حياتك
حسب ما يرائيتك
وتملا الحواري
فساقي وقصاري
تسبح بحمدك
وتشكر جميلك
وفضل الزباله
وطفح المجاريه
ختاما سلاما
واخر كلاما
ضرورا
يسود الهدوء والوئاما
فماذا والا
ح طربقها واللا
اهرب فلوسي
واسافر قواما
سلام عليكم
وسلمون وموز
بصفتي رئيسا
وابا
وجوز